老少咸宜放題~韓舍~

食放題好多老人家都驚，有啲唔愛食生冷野
有啲就覺得淨係食肉好油膩，想食多啲菜
但後生一輩就係想食壽司刺身或者炸物啦!
跟住有人提議韓舍，果然無介紹錯呀!
去到門口有大量椅，等大家等候入座既時候可以坐下

仲會有好味既爆谷等你食
等你等位嗰陣唔會餓親

由於我地係早去既關係，所以好快就入座啦
大家記得要訂枱呀!!我地走嗰陣係爆曬座架!!
抽風做得好~我地走嗰陣都唔覺自己食完韓燒

先講下韓燒區先
肉類、菜類都有齊
肉類：五花腩，辣味／原味雞翼，雞腎，牛脷，多春魚，三文魚頭，丸類，芝士腸，魷魚...........基本上豬牛羊雞魚都齊，想食咩既就自己揀啦

牛脷切到一口牛，不會太膩
其他肉類都不會份量太大，可以試多幾款
味道方面都唔會太濃味，味道剛剛好，不會因為太濃要狂飲水
最愛都係辣味雞翼，辛辣刺激味蕾，又不會遮蓋了少少鹹味，都ENCORE幾次

菜類：洋蔥，冬菇，雞脾菇，三色椒，粟米，矮瓜，豆角
愛多菜的健康人士都有不少選擇
蔬菜都新鮮，沒有黃黃的或者老老的，全都沒有添加調味，喜歡燒完清清地食原味又得，喜歡多少少味，可以自己添加醬油都可以　　

　　

我地就揀了一啲肉類燒住等，就去拎前菜食啦
前菜選擇都不少，有韓式，日式
韓式有泡菜，豆芽，翠玉瓜
最喜歡都係泡菜同翠玉瓜，兩款都帶中辣程度，泡菜還有少少酸可以更開胃　

日式有凍豆腐，枝豆等
賣相討好，全部都一啖一份，唔怕浪費

冷盤有蝦，青口
青口唔會無曬味，仍然有淡淡的鹹味
個人認為加唔加調味食都可以　

蝦肉爽嫰有膏甘香美味

刺身選擇有5~6款
三文魚，八爪魚，象拔蚌，希靈魚，鯛魚
各樣刺身都新鮮
三文魚魚油豐富，令到口感豐盈
象拔蚌爽脆帶鮮味
八爪魚仲帶淡淡的海水鹹味

而壽司亦有多款選擇
但食到呢一刻都試唔齊咁多款啦
出面好多時食壽司刺身放題，會勁大舊飯，刺身就勁薄勁細
呢度飯同刺身比例都剛剛好

熟食就真係肚皮無咁多位啦~
挑了奶油津白，焗薯　
奶油津白：清甜，醬汁屬於少鹹唔會蓋過津白本身的味道
焗薯：夠乾身，有陣陣香草味

炸物：（放進同行親人的肚，自己的肚皮要留位放燒菠蘿）不太油

燒菠蘿～～我來啦～～～仲要加埋辣味雞翼～
燒完既菠蘿特別甜同多汁

飲品方面
愛冰的可以有沙冰
愛汽的可以有汽水
愛熱的可以有美祿、好立克、熱水、熱茶
已經可以到一個要乜有乜既情況
總有一款啱你選擇

甜品、生果
信義妹就食咗一兩樣，無每一樣都試

樣樣都好精美
所以大家愛甜品的要留肚呀

抺茶味慕絲蛋糕
唔會帶苦味，有陣陣茶香
甜度適中

朱古力噴泉、DIY 雪糕

本身仲想試整埋棉花糖
但肚皮放不下了~~~~~可惜~~
下次要試咗先~~~~

價錢方面，唔同時段唔同
但有咁多野食都抵啦~~~~

地址：旺角彌敦道593至601號創興廣場9樓

未到深宵已高朋滿座~深宵食堂~

難得有家人可以幫手睇小朋友
就同六仔一齊去二人世界一番
上次朋友食完經常都提在口邊
我地今次都走去試下
深宵食堂

幸好我地時間相對早，所以無訂枱都有位
但我相信都係要訂位好一點
因為我地一坐低無耐就差不多坐滿人啦~~~
好彩.................早一步.............

芝士蟹肉玉子燒 (走蟹肉版) $78
由於信義妹近期唔食得蟹住，
所以就唯有走蟹肉啦

玉子燒上用茄汁寫上深宵二字
店員還會細心地幫你切開一份份的
但係信義妹相機食先就唔勞煩店員啦
切開少少就已經有芝士流出
到中段的時候，芝士間直滿瀉
蛋亦都軟滑，唔會太乾
味道除了濃濃的芝士香仲有茄汁的酸甜提升味覺享受

黑松露鵝肝雜菌石窩飯 $118
鵝肝甘香，油份滲透飯與雜菌
令到全個飯都啖甘香美味

店員會好好地幫你把飯同鵝肝撈好
信義妹最欣賞有飯焦
令到口感多了一層脆脆的感覺
而飯不會太鹹
但如果唔喜歡鵝肝的羶味就會覺得一般啦

芝麻雞翼 $48
離枱都已經聞到好香的芝麻味
雞翼炸起不油不乾
嫰滑多汁
而雞皮脆口，雞翼尖脆到可連骨食
味道適中唔會過鹹帶微微的辣

8吋蒜蓉大虎蝦 $98
我地就覺得價錢上略貴
不過都試下啦!
有生熟蒜鋪面，熟蒜夠香脆
但信義妹就唔喜歡生蒜帶甜味
好彩蝦都夠彈牙

原隻燒巨菌 $32
菇面有木魚
調味的盬同黑椒唔會蓋過菇的香濃
唔會太乾，食時仲會有種JUICY 的感覺

生燒牛脷芯 $38
牛脷芯燒得剛剛好，有彈性又不會太韌
油份充著濃濃的牛香味

燒雞軟骨 $28
這個調味特別有盬、黑椒、孭然的味道
為淡淡的軟骨添多點味道

黑松露牛油帆立貝$68
一睇到張相就知係增肥之選啦
勁大件牛油係中間
亦都因為牛油香令到帆立貝更香

甘桔檸檬蜜 $28 (熱)
少少鹹少少甜
對信義妹來講相當滿意

抺茶紅豆冰 $28
對我地來講就略甜
不太好甜的朋友記得要叫少甜

店員有禮
上菜速度合理
雖然地方有少少迫
但係都可接受
洗手間夠寬敞
下次會想試下深宵薄餅
今次太滿足啦~~~~~~~

地址：尖沙咀厚福街12號藍馬商業大廈5樓

辣不辣同樣出色~四姐川菜~

愛辣的一聽到有得食辣不知幾開心
終於擇好日子就同辣朋友一齊相聚
地點唔算難找係禮頓中心後面

碗具都精美
仲有有圖有真相的MENU，等大家唔知嗰款餸係點嗰陣都有得參考一下

兩個人可以揀兩款涼菜，三款熱菜
四川涼麵
麵有咬口，不會淋身
食完碟底都係乾身，隔水隔得清
醬汁，放上枱嗰陣就已經聞到麻麻辣辣的香味
朋友見到呢味就已經話無來錯食飯

醬汁會有酸菜跟辣醬配合得好好
辣中帶少少酸，而酸不會搶掉辣的味道
而辣就算係小辣
喜歡樣樣都辣到噴火既朋友就要同店員講一下啦

重慶口水雞
雞肉夠滑，就算係雞胸都夠滑
醬汁充滿複雜的味道
薑、芹菜、黑醋、蒜、辣油、花椒、麻椒幾味於一雞
食完雞不知幾想叫碗白飯撈汁
但驚之後食唔曬無謂浪費，食埋其他先

川式椒鹽蝦
呢個係唔辣的
但係椒鹽緊緊黏住蝦殼入味
蝦肉爽口彈牙
如果個殼可以再脆身一點連殼食就好啦~~~~

 而蝦腸亦都起出
唔駛自己挑腸

 到招牌水煮魚啦~
遠遠就已經聞到一大陣辣味
乾辣椒鋪滿整個鍋面，見到都流口水

建議大家先食底的魚肉，等鋪面的魚肉可以吸收更多的汁先食　
 另外，信義妹之前食過好多唔同店的水煮魚
四姐的魚確實出色，完全無骨
之前食開每次都要挑骨，或者食時要格外小心避免食到骨
四姐的魚無骨令到大家可以繼續暢所欲言
魚肉夠滑，沾滿辣汁後更加刺激神經

鍋底會有大豆芽，跟粗身薯粉
大豆芽跟薯粉吸收了醬汁更惹味

 金湯牛肉
點呢個係因為係街外的店少見到
所以一試
呢個係最驚喜的一味，亦都最想再食多次的一味
湯底：帶泡椒酸辣，有濃郁的蒜味
牛肉：唔韌無筋香嫰
內裡亦都有幼薯粉，撈湯食一流

蒜蓉炒油麥菜
無青味，一點都唔油
對於食完一輪辣味，
呢味確實可以為大家清清味蕾
每枱都會送一碟

 食完發現，欠缺少少甜品
如果可以有甜品選擇就更好啦
店雖然不大，但座位寬敞，坐得舒適

地址：銅鑼灣耀華街３號百樂中心１０樓

草帽出動之蒸氣石鍋

蒸氣石鍋海鮮想試好耐架啦
但一值都覺得食海鮮要好大BUDGET，遲遲都未去
直到朋友話近期做任飲任食就去大飲大食一番啦~~~

由於我地揀時間比較早
六點入座，所以未算多人
見到草帽真身啦

一入座已經有花生俾你邊等邊食住先架啦

店員都好詳細介紹我地既選擇
先揀粥底：分別有排骨粥或瑤柱淮山粥
再揀五款海鮮
如果大家覺得唔夠喉，可以自己再行出去睇下想揀咩架
咁當然要加錢啦
有三大個海鮮櫃俾大家選擇　

揀完五款海鮮就可以出去個自助調味吧混醬一番

調味吧整齊配料夠多
芫茜、冬菜、辣椒、ＸＯ醬、麻醬、生蒜、熟蒜等等都有齊
最開心就係見到有剁椒呢個醬
喜愛辣的大家不要錯過這個剁椒

混醬後，店員就會俾原盅燉湯
西洋菜燉唐排湯
不太油同鹹，一盅既份量都多，如果驚飲唔曬就SHARE 會比較好

到主角啦~
先來貝殼盛盆，分別有馬刀貝、蕃薯蜆、花甲王
初嚐一口，沒有任何調味，透出淡淡海水的鹹味
蜆肉爽口，清甜鮮味
完全不需沾之前的混醬

中蝦
每隻都有手掌般大小
仲要隻隻有膏，蝦肉彈牙

蟲草花鮑魚
通常係屋企都係用果皮蒸
今次一嚐用蟲草花的配搭，感覺新鮮
鮑魚肉爽口
另外店亦都會幫你把內臟先清好

到最驚喜的南非龍蝦，每人半隻
會有少少生熟蒜作為調味
但信義妹就覺得唔駛生熟蒜都好夠鮮味
肉質堅挺不會霉爛
由觸鬚到尾都帶著膏香
食到龍蝦已經覺得值回票價

蟶子皇
會有蒜同粉絲托底
蟶子清甜彈牙，不會太韌似食橡膠

日本大元貝
雖然同樣以蒜蓉粉絲托底，但元貝的鮮味
已經帶俾大家不同的味覺層次

食完海鮮部份，就到任食的部份啦
肉類：蟲草雞、污糟雞、豬頸肉、肥牛片
丸類，釀物：豬肉丸、鯪魚球、釀豆卜、釀涼瓜
飯、糕、包類：蔥花卷、馬拉糕、紅棗糕、荷葉飯
蔬菜類：甜粟米、勝瓜件、南瓜件、香芋件、雜菜籃

由於我地食完海鮮類都飽八成
所以任食類點得不太多
肥牛雪花均勻，入口不會太膩，厚薄適中

 超甜南瓜，呢個我地點咗兩次

蟲草雞
 有勁多蟲草花，雞軟滑

 釀豆卜
這個信義妹就覺得一般
因為帶少少油的感覺

 荷葉飯
份量比出面的珍珠雞細
啱曬食到飽又想試味的朋友
 內裡有冬菇，蝦米，如果多少少配料就更好啦

 全程客人都不需親自動手去蒸，店員會為你處理好
客人只負責食同聚舊就可以啦
飲品係任飲，有汽水，啤酒，竹庶水
地方都整潔，會有生熟筷，生熟鉗

地址：旺角道１號壹號商業中心１樓全層