2017年12月24日 星期日

大鍋熱潮~韓舍~

近期都有股熱潮~
就係用個勁長勁大既鍋裝滿海鮮既海鮮鍋
信義家梗係唔會錯過呢個熱潮
就走去韓舍訂枱試下啦~
而家試食價係$298一位大小同價
係上鍋前大家可以去裝飲品
有熱飲凍飲
仲有湯品
前仲可以食啲熱食

鍋上啦~
嘩~~~~~
一上龍蝦同麵包蟹一隻出鉗,一隻彈跳
極新鮮
嚇到小卷哇哇大叫
係推廣期間
會送肥牛,五花腩,餃子,薯粉,年糕
肥牛同五花腩唔知係我地煮既時間過長
定係本身係咁韌呢...............
咬到信義妹咀都軟埋~
哈哈哈

熱食最推介就係水煮魚
魚用魚塊,唔駛怕有骨
可以大大啖咁食
而辣汁雖唔係極辣
但香、辣、麻味做足
絶對要再添食之選
甜品亦都有聖誕系列蛋糕
亦有水信玄餅
仲有馬卡龍、雪糕、棉花糖機可以自己一試等等
愛甜的仲有一款啱你

想食既大家記得唔好WALK IN 入去呀
因為要預番每個人既份量
所以要訂架!!

2017年11月7日 星期二

磯燒放題~千賀水產~

見朋友上次係元朗食磯燒
自己都去試下啦~~~

款式多
刺身、壽司、炸物、鍋物、意粉、粥等等都有
總有幾款啱你口味
來得就梗係主打磯燒架啦
但好怕成身味喎
唔驚~有個抽油烟機對住
食完都無味~~~
有自助沙律前菜吧
中華沙律、蟹籽、沙律菜、青瓜絲、味付螺肉、八爪魚、粟米、蟹柳
醬汁有芝麻醬同沙律醬
信義妹就試咗沙律菜同青瓜伴少少芝麻醬
沙律菜唔會有黑邊,
青瓜爽脆
生果甜品都係自助
有啫喱、西瓜、菠蘿、蛋糕、撻
連啫喱都有好幾種味可供選擇
信義妹食咗啫喱同菠蘿
菠蘿超甜!
啫喱份量剛剛好過口癮,唔會太大杯食唔到其他
雪糕雪條有不同口味
壽司大細剛好一啖一件
韓風霜燒牛肉
牛肉薄切,外啡內紅
但無血水滲出,生熟程度剛剛好
配上燒汁更有風味
磯燒菜類
芝士農場蛋
蛋黃的甘香配上芝士
燒起的時候還有芝士拉絲啊
枱上付有鹽方便自己調味
香酥雞軟骨粒
呢個係二人份量來架
雞軟骨唔油,有少許調味
味道唔太濃
刺身
雖然擺盤未算精美
但夠新鮮無雪味
甜蝦鮮甜大隻
希靈魚爽脆唔會過酸
磯燒食物到啦~~~
一上枱~~~~
哇哇哇
隻蝦好大呀~~~
有個爐咁大
鮮甜有羔
海貝大家記得一定要叫啊
濃濃的海水味加上海鮮既鮮甜
ENCORE了好幾轉
榴槤炸彈 (圓型)
外脆內軟
表層不油
內裡有濃味的榴槤肉
榴槤控要試啊

一口芝士
比榴槤炸彈皮更薄
芝味濃
如果唔係最後叫
應該會食多兩件~
最後食埋生果
就完美啦~~~~
今餐滿足啊~

2017年11月3日 星期五

與小三偷閒~緣聚西日~

自從小四出世之後,就好少機會可以同小卷獨處
難得六仔要開夜,信義弟有時間,就叫佢好好照顧小四
等我同小卷可以出去行個圈
不過呢個圈超趕~~~~哈哈哈
就揀去食下放題啦

HALLOWEEN 報置
小卷問................點解HALLOWEEN 骨頭一定有血既呢?
點答啫..........唔知呀...........可能恐怖啲啦~~~
食物選擇多樣化
小卷未能食生冷食物
所以刺身壽司絶緣啦~
但仍然有不少選擇
飲品有兩個凍櫃任你揀
由維他奶,乳酸飲品,到酒都可以揀
刺身無雪味
新鮮甜美
螺有咬口
唯獨帶子切得有點兒碎
但不失鮮味
希靈魚唔會過酸,酸味剛好
芝士焗蠔
芝士味香濃配上蛋醬有另一番滋味
蠔爽脆,脹卜卜

燒多春魚
沒有多餘的調味
熱呼呼的魚春沒有帶腥
小卷不斷ENCORE
燒蝦
很大的蝦啊
食指都唔夠佢長
蝦肉沒有被燒乾
肉鮮甜,加上殼上的燒汁味道更佳
印度薄餅有得揀朱古力、煉奶或者咖哩
薄餅唔太油,口感酥軟
朱古力醬似食梗PANCAKE
咖哩醬沒有太大驚喜,
唔辣偏向甜口
雞軟骨串
小卷一食瘋狂
有少量胡椒加准鹽調味
當媽的都只能分到一粒
又是不斷ENCORE
壽司一啖一口
唔會有大大舊飯,得少少餸
比例好好
信義最欣賞係和牛壽司
油分怖平均,
僅僅熟的牛片配上生蔥味道
沒有血水流出
沾上豉油,蔥脆牛軟,口感味道令人難忘
信義妹最愛生蠔,長腳蟹
生蠔
來自愛爾蘭
雖然肉質無咁厚
但係味道CREAMY,帶有陣陣鹹味
肉質算脆口

長腳蟹
超大隻~~~
一上枱哇的一聲~~~
蟹肉結實,鮮味十足
歡樂既時光過得特別快~
要番屋企啦~
小卷食完仲話下次要再去呢~

地址: 元朗西裕街5-11號金福閣地庫











2017年10月15日 星期日

星座風~白羊。座~

動漫迷既星座,應該係聖闘士星夭
女生既星座,應該係星座運程
CAFE既星座,應該就係呢間白羊。座

白羊座日系風格報置
碟很美啊!
原塊西冷牛扒配飯$78
汁有幾款選擇,黑椒、洋蔥、燒汁
信義妹揀了洋蔥汁
上菜啦~~~~
飯大約一碗份量
牛扒勁大件
牛扒有黑椒醃過
洋蔥汁亦都帶有微辣
味道不算濃
牛扒唔硬,鬆軟、大約五至六成熟
內有鮮紅色但無血水
肉汁緊緊鎖住
另外點多一個小食
去骨露筍雞中翼配薯角 $40
雞皮燒到香脆
雞肉嫰滑,不太鹹
可惜露筍太乾

薯角唔油帶微微辣
點了朱古力熱飲
比一般餐廳大杯啊
還印有白羊座的星號
枱之間既距離有點兒近
帶幼兒同行的話要小心碰到

地址: 大圍積信街63號積信樓地下59號舖

甜在心頭~糖宮~

信義妹見心情麻麻
(最近都多野煩)
一於甜品當午餐
走過積信街,被報置吸引停下來
望落舒適,就走入去叉叉電啦~
信義妹碰到剛開舖,真係有啲唔好意思
但店主仍然親切款待
見信義妹初次來就細心問了喜好,
再介紹幾款可供選擇
細談下,店主原來還有即磨咖啡,
可惜信義妹要餵奶唔可以一試
三層TEA SET 還會遲下推出~~~
喜歡HIGH TEA既信義妹遲下都試一下~~~
店內信義妹有一樣極欣賞
店主把椰皇殼環保再用,再畫上不同表情
成為一個個可愛既餐牌夾
另外,店內有不少蠟筆小新既公仔
講番食~~~
信義妹今日甜品當正餐,肥死無怨
哈哈哈

美麗槤夢露 $48
榴槤加芒果配給信義妹唔同既味覺享受
榴槤香濃,甜度高,果肉綿
配上芒果清甜,果肉粒狀形成口感對比
西米軟糯
細細粒既西米配上生果,除口感增加,仲增加了滿足
雲尼拿雪糕的選擇令到視覺上顏色和諧
唔知係咪因為信義妹行入店嗰陣顯得熱到快溶
店主另推介朱古力心太軟伴雪糕
雪糕有兩球啊!!!!!!!
有好幾種味選擇,
但信義妹好快就揀了綠茶加雲尼拿
感覺上呢兩隻味應該唔會為我增太多磅
(自欺欺人~~哈哈)
每次信義妹一叉開心太軟都忍唔住會哇一聲
朱古力漿如泉水湧出
外脆內軟,多重口感
配上雪糕一冷一熱
唔同滋味感受
糖宮坐位舒適
空間闊,枱與枱之間唔會好近
信義妹可以帶埋細路都唔怕
朋友細細聲傾計都唔會俾隔離聽到
傾計下原來還有閣樓
全店總共可以坐40~50人

傾傾下,店主請咗件芒果俾信義妹食
真係有啲唔好意思
原來門外的結他係店主自己的啊~~~
久不久會跟客人JAM 歌
滿有朋友感覺既一間店~

對於學生有額外折扣

今次甜品當午餐既決定無錯
能舒適既環境下享受到甜品
又可以傾下計
遲下再去應該會見到HALLOWEEN報置

地址: 大圍積信街61號地舖

2017年10月14日 星期六

兩種材料的自家豆漿布甸~

呢個係清家裡貨的甜品
話說信義妹上次到娘家BBQ既時候試咗整MARSHAMALLOW SHOOTER
好明顯信義妹同小卷飲既SHOOTER係橙汁
其他人係咖啡、酒不等啦
整完一大輪仲有一大包

老實平時我地都唔係點食糖...............
連俾小卷既糖都自制
所以呢包棉花糖就快擺到菇都出埋
信義媽就係咁催信義妹諗下有無咩可以搞搞佢.................

結果又搞一輸大龍鳳~~~~~
豆漿布甸
呢個甜品我只可以講一半係健康..........
有一半係唔健康
健康既原因係豆漿係自制
但棉花糖.......係超甜
少食宜情.........多吃可能會亂性...........

由於棉花糖本身都甜到漏
所以信義妹豆漿就一啲糖都唔加啦
如果你係甜魔既話,就自己著量加一點

材料:
自家無糖豆漿  1L
特大棉花糖      大約70g

大家無睇錯
兩種材料就可以完成
超簡單,味道都不差啊

步驟:

 1. 先把豆漿同棉花糖同煲先~
2. 記得係開細火,唔係就好易燶架啦
3. 煮溶啲棉花糖後,就過篩,等個布甸滑啲
4. 一杯杯裝好就可以入雪櫃啦!

信義妹個比例係比較多,
因為唔想咁甜
如果愛甜既記得豆漿要少啲啊
雪一晚就食得架啦~

2017年10月10日 星期二

素湯~蘋果降脂湯~

信義妹同六仔既湯路從來都係唔同
信義妹飲過六仔既湯之後就唔煲佢嗰啲啦
煲極都唔及佢煲得好飲既
所以都係煲其他啦~

材料:

白背黑木耳  4大朵
(活血、防止血管硬化,促進血液循環
降血脂,對心腦血管疾患有很大助益)

蘋果 3 個
(防止貧血、高血壓,增進食慾)

腰果 1碗
(增加抵抗力,降血壓,養顏)

紅棗 12粒
(止咳潤肺,補血養氣)

果皮 1角
(袪痰止咳、解膩)

步驟:

1.先將木耳浸泡
2. 蘋果你鐘意點切就點切啦~~~~
去芯去蒂
切片又得,切塊又得
切粒仲得
3.紅棗去核,腰果備用


4.果皮係六仔既陳年果皮,所以無需去嚢
5. 將浸透既木耳切絲 (切角都可以)
6. 加水,果皮凍水落
7. 水滾後就加埋其他材料 (紅棗除外)
8. 如無真空煲就需要煲大約兩小時
9.飲前半小時加埋紅棗翻煲

完成圖~~~
呢個湯小卷勁愛
連添好幾碗呢~~~