嚇一嚇的~8週~

來到8週
又有驚嚇..................
啡小姐，紅小姐，你又來啦!?!??!?!
我無電召你地來, 我唔俾錢架....................
你咪諗住送上門我就要先得架
我唔係一個咁隨便既人來架

又去到急症室作一個漫長的等待
等到見醫生啦~
照過小立無問題
今次遇到有趣的醫生
佢好快就閂後門啦
一輪咀咁講食西醫的安胎藥，同打安胎針係無功效的
係出面啲醫生喜歡吹虛各樣
你要打都可以但係這裡無得打，亦都 無得開
信義妹同六仔聽到一半的時候，都互望了一下
難道我們的樣子寫了...............很想打或者很想食........................
其實信義妹都嘔到反曬肚啦................食到都唔想食藥啦.........
呢個世界咁多好野食..................
打針呢.............就..............唔好啦掛...................
不過可能醫生俾人問得多就本能覺得你兩個都係咁架啦~~~~

　　

痴著床的~7週~

第7 週整週除了食訓痾，就真係無做過其他野
但食都唔係乜都食到...................
睇來都係要同小卷嗰陣一樣嘔到入產房前架啦
今次仲要送埋胃痛同暈
真係有幾項俾我慢慢享受

但.............因咩我兩胎都要嘔到爆曬微絲血管先安樂架......................
其實我都想做個靚媽啊.....................

再番醫院覆診的時候...................
醫生表示追到啦~~~
小立符合7週大小啦~~~
YEAH!!!!! 這星期懶豬行動沒有白費
繼續懶豬下去啦~~~~~

其實係醫院覆診的時候都真係挑戰人既耐性......................
我明白政府醫院係要等的
天下間無免費的午餐
出唔起錢就唔好咁多聲氣
但係 .......................我真係未試過要等咁耐.................
封信寫兩點FIRST PRIORITY.........
我明既~一定唔係兩點睇，但你都要早過兩點到
我同六仔就點半已經等...............
一坐就坐到六點............睇見那裡的RECEPTION 都準備收工
(係呢度...........我要聲明我地兩個無MISS 過自己被叫的...............因為我地就係驚MISS 咗要重新再排，所以一步都無離開過...................)
終於都叫到啦~~~~~~
當然醫生都趕著趕著，見你無大礙就可以啦
好!!!醫生叫我地出去排期做其他檢查
信義妹當然叫六仔咪理我，嗱嗱聲碌出去先啦，我自己慢慢行
老實講自己都係打工既，遲收工梗係唔高興啦
有趣既事就來啦.............
當到排期櫃位的時候，趕收工小姐話：你遲啦！排唔到
下！？！？！？啱啱出來，遲咗３０秒咋喎！？！？！？
趕收工小姐先至勉勉強強叫我地等等。。。。。。
跟住就到趕收工阿姨。。。。。。
佢俾一堆半張Ａ４紙的表信義妹
填好交俾佢啦～
趕收工阿姨又話呢張無填嗰張無填，其實係佢呢樣無睇嗰樣無睇
OK FINE唔梗要，你話無填咪再填俾你囉，但你唔好要我咁多張再填一次
到第二張佢再話無填嗰陣，已經忍唔住爆咗句
＂呢張咪填咗囉！成叠俾曬你啦！你睇下先！＂
結果趕收工阿姨即時好似清醒咗咁，停一停，搵一搵
又去番趕收工小姐。。。。。
再叫名的時候，以為已經排好期啦！終於可以走啦
結果趕收工小姐係俾個號碼排叫我地係出面再等
時間大約４５分鐘。。。。。。
下！？！？！？！
可能。。。。信義妹跟六仔呢個＂下＂真係下得大聲咗。。。。。
所以等咗５分鐘就已經可以拎埋期走啦。。。
但出面仲有成棚人係度等.................
真係名乎其實由天光等到天黑...........................
攰死............................

驚驚的~6週~

來到6週
除咗由5週開始有點兒不適，其他還好啦
好多人都話第一胎辛苦，第二胎舒適
我覺得係因為陀咗第一胎有經驗
知道自己聞到咩會嘔，係咩情況下會暈
係知道第二胎一開始已有防範咪舒適囉~~~~
今次六仔一知道就已經碌去買定啲防範措施
所以我TOUCHWOOD到6週都叫可以啦

但可以還可以....................
點估到會突然見紅流啡呢.....................
唉......六仔唯有嗱嗱聲同我去醫院啦

去到醫院急症室......................
今晚醫務人員辛苦啦................
孕婦都要等六小時..........................
(陀小卷係另一間醫院係半小時內見醫生，兩小時內必定可以走)
六小時後，信義妹終於都見醫生啦
醫生表示要多休息
再作觀察
如果再有流啡見紅，都係再入院較好
加上小立亦比預期的細一週多，所以要覆診
聽到再流啡見紅不可怕
聽到小立比預期的細一週多才最驚

最後，我係有得抖就抖當自己廢人一樣
有得食，食得落就食
可惜的是我每次只有胃口食兩啖......................................

平安的~5週~

來到5週終於係一星期紅D 綠D 都穩定地變深了
終於都有勇氣去搵醫生拎證明
可能陀過小卷既關係，今次都相對淡定
走到醫生那裡....................

醫生：你真係有呀！
信義妹：係
醫生：咁你想點呀？
信義妹：麻煩你俾證明我要去醫院證記
（其實搵得你梗係想搵你俾證明架啦，唔係你覺得我搵你做咩呢？醫生？？）
醫生：咁即係你去政府生呀？
信義妹：係呀
（我搵你，係叫你俾證明，我去政府定私家其實都唔係好關你事，我睇你啲CERT無一張係婦產科架喎。。。。。咁係咪你近期進修梗想拉客？？？？？）
醫生：咁你政府生就要寫信俾你去啦
信義妹：麻煩你醫生
醫生：咁無野啦
信義妹：麻煩你寫埋我幾時預產期呀
醫生：乜要寫既咩！！？！？！
（我諗我係咪入錯店。。。。。。點解好似搵著個替更既咁呢？？？？）
跟住醫生先嫌麻煩咁拎起張俄儸斯輪盤轉轉下咁查下我幾時預產
醫生既臉色多少有點兒不悅
唔知係咪因為唔識得查俄儸斯輪盤啦
信義妹：同埋我要一式兩份
醫生：下？
信義妹：因為公司要正本，醫院都要正本
醫生：點解你公司都要正本？
信義妹：我都想知點解佢一定要正本，但係你可以查番我上一胎都係係你地呢度拎證明，我之後都係要番來叫你地另一位醫生PRINT多張俾我交番公司
醫生：咁即係一模一樣就得啦？
（我之前唔係講咗話要一式兩份咩？？？？醫生。。。。。。。係你聽唔清楚，定係我講唔清楚呀！？！？！）
信義妹：係呀～唔該醫生
其實。。。。。。我俾三百幾四百蚊。。。。。。問你拎多張一模一樣都應該唔係好過份啫。。。。。。。定係我要加錢拎多張.............你直接話我知啦................