2016年8月30日 星期二

神奇的~4週~

自從愛與痛的邊緣後,就不敢提早偷偷驗
免得一場歡喜一場空
但今個CYCLE就好似有感應的一樣
很想很想驗,好似同自己講今次一定成功一樣
好就試一次吧

喜出望外,紅D 綠D 都有反應
只可以講但求不斷加深
加油呀!!!!!
爸爸媽媽等你啊!!!!!

2016年8月20日 星期六

又到改胎名時間

識得耐既朋友都知小卷點解會叫小卷啦
但對信義妹來講,第二胎的胎名就一直在想想想
(事源我地一開始都想行二胎政策,對小卷可以話有個伴一齊成長,二來,我都擔心將來我兩老有咩問題,唔駛小卷一個人一力承擔。又或者將來我老掉牙的時候,會嘮叼不停,小卷總有個可相依的傾訴一下)
因為我好似想不到更好的,又有意思的名
始終覺得臘腸卷是最好的
有朋友好早就提議叫小小卷
但我又覺得好似欠缺多少誠意
大既叫小卷,細既叫小小卷........如果有幸再生多個咪要叫小小小卷~~~~
哈哈哈~~~

到某一日,信義妹跟六仔又談及呢個話題
信義妹突然就話不如叫小臘啦
六仔就覺得一般既
但總比朋友提議既小小卷來得好一點

最終點解會變成小立呢?
因為於立春既月份我地與小立相遇,
我地相信這種緣份難能可貴
所以就將小臘改為小立

其實有朋友聽完覺得有點兒怪
佢地好多問完叫咩呀,就靜咗...............
但我又真係諗唔到再有更好的啦~~~~~


2016年8月16日 星期二

令人懷念的~CASA FINA~

CASA FINA~ 同六仔拍拖的時候就已經到過
那次是慶祝信義妹生日呢~
不過再跟六仔提起的時候,六仔只記得去過同好食......................
完全唔記得是慶祝信義妹生日~
今次再來是同友人閉關前聚會
就揀間私隱度高一點地方濶一點的吧
場地燈光浪漫,情侶,朋友聚會都倍感舒適

先來個湯先~
黑松露什菌忌廉湯 $88
味道濃郁,喜愛菇菌跟黑松露的人必定最愛
湯既CREAMY 又有菇菌的咬口 
蒜蓉包香脆可口,牛油味濃
虎蝦阿拉斯加蟹肉龍蝦汁長通粉 $208
蝦夠大夠爽
蟹肉份量都夠,唔駛搵都食到,哈哈哈
長通粉就軟硬程度適中
到整個菜既靈魂,醬汁
龍蝦汁緊緊地掛係長通粉同蝦上
每食一啖都食到濃濃的醬汁
味道不會過鹹或者醬汁太薄身
CREAMY的口感完全符合我的口味
北海道帶子墨魚汁意大利飯 $198
呢個食得要比較有儀態,唔係就一咀黑色咁同人傾計架啦~~~
帶子大隻內裡鮮甜
微微煎過的面帶來濃郁的帶子焦香味道
飯上舖滿芝士,令到個飯更加濃郁
墨魚汁不會過鹹有陣陣的海水味
醬汁不會太稀,稠稠的令到每粒飯都沾上汁
飯帶煙韌
香煎智利鱸魚配菠菜汁 $348
魚一啲都唔腥
魚皮脆口,魚肉鮮嫰,做成兩種不同的口感
既香口又帶少少鹹
伴菜亦都唔失色,燒到外脆內軟,瓜汁緊緊鎖住
露絲瑪莉燒原隻去骨春雞 $298
燒雞比我的印象會係又鹹又唔夠滑
但呢度既燒雞完全有一個極好的印象
皮脆肉更滑,皮又不會過鹹
有微量的香料跟鹹味
伴菜的蒜加埋來食就更能豐富味覺   
朱古力心太軟 $88
女仔永遠都有第二個胃放甜品
朱古力心太軟永遠都能得到女仔既歡心
淨係見到擺位都夠精緻
淨係睇都覺得開心
濃濃朱古力流心跟外邊的脆口蛋糕做成對比
加埋雲尼拿雪糕,一入口,多重口感
唔同甜既程度,一次過品嘗
一個美好的甜品為今次聚會劃上完美的句號
下次再來的時候
信義妹要再試下蠔,今次閉關前唔食得,唯有忍下口啦!  

2016年8月12日 星期五

BRUNCH ~OCIO~

約朋友交收,本身諗住食個TEA,歎下CAKE
點知朋友今日餓底,搞到變咗好似食brunch 咁~~~哈哈哈
OCIO 早在旺角店已經想食
但一直未搵到朋友一齊去
而家係大圍有就唔駛走咁遠啦~~~~
所以就一於去試下!

地點唔算難搵,由火車站集合行去餐廳都係5~10分鐘
地方雖然唔太大,但坐位唔迫,講秘密都唔驚俾隔離聽到~

講番食物,由於朋友今日餓底所以就點咗個
奧斯滋味早餐 (ALL DAY BREAKFAST) $93
份量絶對唔少,女仔如果唔係食量大的話就真係搵人SHARE 會好啲
多士係厚切,有少量牛油,外脆內軟加上茄汁豆味道不錯啊
薯條係粗身薯條,同樣是熱辣辣,不太油,有少少鹹味
滑蛋夠滑,不過我就覺得流汁較多,不太適合個人口味
炸雞味道不會太濃,軟軟的,如果唔係用麵包糠炸就更好啦
有蕃茄跟沙律菜可減低炸雞的油膩感
芝士肉醬千層麵 $69
有勁多芝士,芝士控必選
肉跟麵無因為多芝士變得過鹹
鹹味跟蕃茄既微酸增加食慾
最吸睛的都係有靚靚花碟
信義妹跟朋友一見到就已經大讚集碟好靚
兩個都叫了餐飲
泡沬咖啡
泡沬幼滑值得回味,咖啡味香濃
熱朱古力
雖然普通飲品,但都有靚靚拉花
食完就叫了朱古力香蕉班戟 $59
有勁多朱古力醬
班戟內的慕士又不太甜加上片片杏仁脆片
為口感帶來多種層次
另外再加了杯蜜桃紅茶
這個有點兒普通只係茶包沖出來
不過都為這餐作最後清清味蕾
TEA 的時間去餐廳不算太多人,
但有一定既顧客幫襯
所以大家想去的時候都要留意一下時間啊!