未到深宵已高朋滿座~深宵食堂~

難得有家人可以幫手睇小朋友
就同六仔一齊去二人世界一番
上次朋友食完經常都提在口邊
我地今次都走去試下
深宵食堂

幸好我地時間相對早，所以無訂枱都有位
但我相信都係要訂位好一點
因為我地一坐低無耐就差不多坐滿人啦~~~
好彩.................早一步.............

芝士蟹肉玉子燒 (走蟹肉版) $78
由於信義妹近期唔食得蟹住，
所以就唯有走蟹肉啦

玉子燒上用茄汁寫上深宵二字
店員還會細心地幫你切開一份份的
但係信義妹相機食先就唔勞煩店員啦
切開少少就已經有芝士流出
到中段的時候，芝士間直滿瀉
蛋亦都軟滑，唔會太乾
味道除了濃濃的芝士香仲有茄汁的酸甜提升味覺享受

黑松露鵝肝雜菌石窩飯 $118
鵝肝甘香，油份滲透飯與雜菌
令到全個飯都啖甘香美味

店員會好好地幫你把飯同鵝肝撈好
信義妹最欣賞有飯焦
令到口感多了一層脆脆的感覺
而飯不會太鹹
但如果唔喜歡鵝肝的羶味就會覺得一般啦

芝麻雞翼 $48
離枱都已經聞到好香的芝麻味
雞翼炸起不油不乾
嫰滑多汁
而雞皮脆口，雞翼尖脆到可連骨食
味道適中唔會過鹹帶微微的辣

8吋蒜蓉大虎蝦 $98
我地就覺得價錢上略貴
不過都試下啦!
有生熟蒜鋪面，熟蒜夠香脆
但信義妹就唔喜歡生蒜帶甜味
好彩蝦都夠彈牙

原隻燒巨菌 $32
菇面有木魚
調味的盬同黑椒唔會蓋過菇的香濃
唔會太乾，食時仲會有種JUICY 的感覺

生燒牛脷芯 $38
牛脷芯燒得剛剛好，有彈性又不會太韌
油份充著濃濃的牛香味

燒雞軟骨 $28
這個調味特別有盬、黑椒、孭然的味道
為淡淡的軟骨添多點味道

黑松露牛油帆立貝$68
一睇到張相就知係增肥之選啦
勁大件牛油係中間
亦都因為牛油香令到帆立貝更香

甘桔檸檬蜜 $28 (熱)
少少鹹少少甜
對信義妹來講相當滿意

抺茶紅豆冰 $28
對我地來講就略甜
不太好甜的朋友記得要叫少甜

店員有禮
上菜速度合理
雖然地方有少少迫
但係都可接受
洗手間夠寬敞
下次會想試下深宵薄餅
今次太滿足啦~~~~~~~

地址：尖沙咀厚福街12號藍馬商業大廈5樓

辣不辣同樣出色~四姐川菜~

愛辣的一聽到有得食辣不知幾開心
終於擇好日子就同辣朋友一齊相聚
地點唔算難找係禮頓中心後面

碗具都精美
仲有有圖有真相的MENU，等大家唔知嗰款餸係點嗰陣都有得參考一下

兩個人可以揀兩款涼菜，三款熱菜
四川涼麵
麵有咬口，不會淋身
食完碟底都係乾身，隔水隔得清
醬汁，放上枱嗰陣就已經聞到麻麻辣辣的香味
朋友見到呢味就已經話無來錯食飯

醬汁會有酸菜跟辣醬配合得好好
辣中帶少少酸，而酸不會搶掉辣的味道
而辣就算係小辣
喜歡樣樣都辣到噴火既朋友就要同店員講一下啦

重慶口水雞
雞肉夠滑，就算係雞胸都夠滑
醬汁充滿複雜的味道
薑、芹菜、黑醋、蒜、辣油、花椒、麻椒幾味於一雞
食完雞不知幾想叫碗白飯撈汁
但驚之後食唔曬無謂浪費，食埋其他先

川式椒鹽蝦
呢個係唔辣的
但係椒鹽緊緊黏住蝦殼入味
蝦肉爽口彈牙
如果個殼可以再脆身一點連殼食就好啦~~~~

 而蝦腸亦都起出
唔駛自己挑腸

 到招牌水煮魚啦~
遠遠就已經聞到一大陣辣味
乾辣椒鋪滿整個鍋面，見到都流口水

建議大家先食底的魚肉，等鋪面的魚肉可以吸收更多的汁先食　
 另外，信義妹之前食過好多唔同店的水煮魚
四姐的魚確實出色，完全無骨
之前食開每次都要挑骨，或者食時要格外小心避免食到骨
四姐的魚無骨令到大家可以繼續暢所欲言
魚肉夠滑，沾滿辣汁後更加刺激神經

鍋底會有大豆芽，跟粗身薯粉
大豆芽跟薯粉吸收了醬汁更惹味

 金湯牛肉
點呢個係因為係街外的店少見到
所以一試
呢個係最驚喜的一味，亦都最想再食多次的一味
湯底：帶泡椒酸辣，有濃郁的蒜味
牛肉：唔韌無筋香嫰
內裡亦都有幼薯粉，撈湯食一流

蒜蓉炒油麥菜
無青味，一點都唔油
對於食完一輪辣味，
呢味確實可以為大家清清味蕾
每枱都會送一碟

 食完發現，欠缺少少甜品
如果可以有甜品選擇就更好啦
店雖然不大，但座位寬敞，坐得舒適

地址：銅鑼灣耀華街３號百樂中心１０樓

草帽出動之蒸氣石鍋

蒸氣石鍋海鮮想試好耐架啦
但一值都覺得食海鮮要好大BUDGET，遲遲都未去
直到朋友話近期做任飲任食就去大飲大食一番啦~~~

由於我地揀時間比較早
六點入座，所以未算多人
見到草帽真身啦

一入座已經有花生俾你邊等邊食住先架啦

店員都好詳細介紹我地既選擇
先揀粥底：分別有排骨粥或瑤柱淮山粥
再揀五款海鮮
如果大家覺得唔夠喉，可以自己再行出去睇下想揀咩架
咁當然要加錢啦
有三大個海鮮櫃俾大家選擇　

揀完五款海鮮就可以出去個自助調味吧混醬一番

調味吧整齊配料夠多
芫茜、冬菜、辣椒、ＸＯ醬、麻醬、生蒜、熟蒜等等都有齊
最開心就係見到有剁椒呢個醬
喜愛辣的大家不要錯過這個剁椒

混醬後，店員就會俾原盅燉湯
西洋菜燉唐排湯
不太油同鹹，一盅既份量都多，如果驚飲唔曬就SHARE 會比較好

到主角啦~
先來貝殼盛盆，分別有馬刀貝、蕃薯蜆、花甲王
初嚐一口，沒有任何調味，透出淡淡海水的鹹味
蜆肉爽口，清甜鮮味
完全不需沾之前的混醬

中蝦
每隻都有手掌般大小
仲要隻隻有膏，蝦肉彈牙

蟲草花鮑魚
通常係屋企都係用果皮蒸
今次一嚐用蟲草花的配搭，感覺新鮮
鮑魚肉爽口
另外店亦都會幫你把內臟先清好

到最驚喜的南非龍蝦，每人半隻
會有少少生熟蒜作為調味
但信義妹就覺得唔駛生熟蒜都好夠鮮味
肉質堅挺不會霉爛
由觸鬚到尾都帶著膏香
食到龍蝦已經覺得值回票價

蟶子皇
會有蒜同粉絲托底
蟶子清甜彈牙，不會太韌似食橡膠

日本大元貝
雖然同樣以蒜蓉粉絲托底，但元貝的鮮味
已經帶俾大家不同的味覺層次

食完海鮮部份，就到任食的部份啦
肉類：蟲草雞、污糟雞、豬頸肉、肥牛片
丸類，釀物：豬肉丸、鯪魚球、釀豆卜、釀涼瓜
飯、糕、包類：蔥花卷、馬拉糕、紅棗糕、荷葉飯
蔬菜類：甜粟米、勝瓜件、南瓜件、香芋件、雜菜籃

由於我地食完海鮮類都飽八成
所以任食類點得不太多
肥牛雪花均勻，入口不會太膩，厚薄適中

 超甜南瓜，呢個我地點咗兩次

蟲草雞
 有勁多蟲草花，雞軟滑

 釀豆卜
這個信義妹就覺得一般
因為帶少少油的感覺

 荷葉飯
份量比出面的珍珠雞細
啱曬食到飽又想試味的朋友
 內裡有冬菇，蝦米，如果多少少配料就更好啦

 全程客人都不需親自動手去蒸，店員會為你處理好
客人只負責食同聚舊就可以啦
飲品係任飲，有汽水，啤酒，竹庶水
地方都整潔，會有生熟筷，生熟鉗

地址：旺角道１號壹號商業中心１樓全層

大熱韓風~達人包車~

近年韓風大盛
出街GATHERING 話題離不開韓劇加韓食
可以話出街十餐都有八餐係韓食
有日朋友提議到有超長串燒食韓食，都好~~~~有點新意~~~

當日由於大家都放假，
所以人地一開舖我地就入去啦 (18:00)
原來有客人比我地更早
我諗如果想七點多食的話就要訂位會比較好啦~

每張枱頭頂都會有個鈎呢個鈎就係掛超長串燒的鈎啦~

坐低店員就會拎前菜俾你
醃蘿白青瓜：對我來講略酸，但朋友就覺得好開胃
粟米沙律：沙律醬份量剛好，唔會分唔到自己係食梗粟米定食梗沙律醬
泡菜：每次食韓食必食之一，呢個辣度剛好帶有陣陣清甜的味道

我地點了兩份主食
1M 超大串燒 $328
呢個係今次來食的主打，一定點啦~
有車厘茄，五花腩，洋蔥，豬肋骨，雞脾菇，菠蘿，肉眼扒，燈籠椒，大蔥，腸，南瓜，雞扒

初時見到呢串咁長仲諗住大件事..............
要廚神上身先燒得完啦
原來店員會過來幫我地手既
呢個服務抵讚
最少客人可以食得無咁忙碌，都唔知係顧得燒定顧得食，定顧得與朋友相聚

店員亦都會將燒好的食物一件件剪好
等你可以好好包起來食

有生菜同醬料準備好
生菜都新鮮，唔會見到葉邊變黃或者發黑

有三款醬料
上面：甜辣醬，個人認為食雞扒最夾
中間：淮鹽，個人覺得食蔬菜最夾
大醬：大醬，個人喜歡食豬肋骨跟肉眼扒時用

我地仲會連埋前菜一齊包住食

另一樣就係辣年糕鍋 $190

年糕鍋都足料
蜆，青口，魚旦片，麵，菜，年糕，蛋，餃子

蜆同青口都無沙
蜆仲帶陣陣清甜味
魚旦片就略甜，配辣湯底就可以中和一下
年糕，本人就鐘意到最後先食等年糕可以吸曬湯汁既味道
個湯底就微辣，帶少少甜

我地仲有叫兩杯野飲既
左邊青色檸檬果汁 $50
朋友覺得似一般汽水
右邊柚子果汁 $50　
我呢杯帶少少酸相對都比較開胃

下次最想試一下涼伴蔬菜豬腳
今次好滿足啦~~~~食唔落啦~~~~

半熟芝士蛋糕

向來都係芝士控既信義妹

一直都想試下諾亞既半熟芝士蛋糕
就趁今日出外工作就順便買番屋企試下啦

有多個款式選擇原味，花味，朱古力味，生果味
信義妹就揀生果味
香芒半熟芝士蛋糕 $139

由於半熟流心的關係
很難影到很靚的食物相
面層芒果酸酸甜甜
果肉都算多
連埋流心芝士一齊食就不會太膩

底層係朱古力味
令到整個蛋糕有幾個層次的甜味
另外我都抵不住士多啤梨的誘惑
杯裝半熟福岡甜王草莓芝士 $69

士多啤梨超甜
沒有帶丁點藥水味
愛果味酸酸甜甜的朋友必定要試　

額外一提
包裝盒超美
有可愛的小鹿

另外，餅店亦有餐具提供
避免大家要剪紙盒當紙碟，搵叉食的麻煩
呢個值得加分

店員亦都好細心
會問路程幾長俾足夠的乾冰
確保食品不會變質