紅豆冰~大家樂~

話說有日信義妹好想飲紅豆冰

奈何週圍只有大家樂先有

唯有等到下午茶時段就去買啦

去到發現到正野啦~~

炸脾加紅豆冰做梗優惠 $25

可惜只有四週

即係仲有幾日就無啦

如果有得繼續就好啦

炸脾

個人認為炸得太乾啦

側邊位全部變曬雞乾

好彩中間都仲嫰滑，中間部份味道超好

因為唔會過鹹，肉汁仲會流出來，肉質夠滑

皮脆帶少少鹹味

紅豆冰
粒粒特大的紅豆
軟稔但不糊口
味道不過甜
花奶加紅豆絶配的組合
可惜就冰多咗少少
少啲冰就更好啦

黑椒豬肚~龍苑~

龍苑都可以算係信義家當叫外賣的地方
今晚突然有朋友自遠方來
所以要嗱嗱聲加多少少餸
龍苑都不失為一個好選擇
就加個黑椒豬肚啦

雖然呢味信義家未點過
朋友見到話想試就試下啦~

未打開盒就已經聞到陣陣黑椒的香氣
一打開就已經食指大動
忍唔住偷食~~~哈哈
熱哄哄的豬肚，份量夠多
無雪味，同埋唔會過鹹
鹹味適中，黑椒味濃
唔食得辣既朋友試就要諗一下啦
另外有配菜的蔥有大量
可以當菜食~~~哈哈哈
汁沒有太多
多汁的話我地應該撈埋飯添
呢個下次一定要再ENCORE!!!!

不過呢幫你落單既店員有時都會火氣猛架~~~

可能呢度鑊氣夠啦~~~

哈哈哈

忌廉芝士控~麥上日光~

早前俾朋友們洗版的一間食店
早早就已經想去試下架啦
可惜.............成日都唔經
到而家先有機會試

信義妹係芝士控
不論咩芝士都啱食仲可以食好多添
當日一個奧地利五層流心芝士包幾個人分
家人就覺好膩
但係信義妹同小卷就覺得可以再來一個喎~~~~~~
哈哈~~
所以呢個要睇下你對忌廉芝士有幾狂熱啦~~~
明顯地信義妹同小卷係狂熱份子啦~~~

先講下麵包先
麵包鬆軟不太甜
忌廉芝士一切就已經湧曬出來啦~~~
睇都勁興奮(信義妹真係芝士控來架!!!)
忌廉芝士會帶甜味，但就無平時芝士的鹹
卻有芝士的香味
雖講不上有口感，因忌廉芝士真係多到蓋過麵包
會有種淨食忌廉芝士的感覺
但係味覺層次係有的

下次就想試下更多新口味

不過店員可能同一個問題俾人問得太多.....................好燥..............
今次信義妹都認無做好功課先去既............
去到店當時十一點多，見店內無咩人，又無包，咪諗住問下店員幾時會出包架
店員態度好似覺得信義妹無知咁...................專登行去個牌再指俾我睇係十二點先會有包
而家點問都無架..................
其實................我都係問一句啫..............唔係挑戰你啊............店員姨姨............你個牌...........同其他野貼埋一堆.............係我無睇清楚................先問下啫.................

午巿選擇~老表雲吞麵~

係大圍做完野攰到都唔想郁啦~~~
就又諗下食咩啦~~費事自己煮完又洗搞一輪
左諗諗、右諗諗
都係去番老表食麵啦~~~
自己一個又唔會坐得耐
呢間都算係醫肚首選啦~

一粒雲吞大約有兩至三隻蝦
蝦爽口彈牙，去殼去得好
試過食過有店啲蝦連殼都未清曬
河粉夠滑，不會太稔身
湯底不會太鹹

不過今日真係堅肚餓
食個麵食到一半發覺唔夠食
嗱嗱聲加多個菜先
通菜灼得不太淋，爽脆
可惜個腐乳醬只有鹹味，
完全無腐乳既香
雖然眼見有少少紅絲，但完全無辣味
下次都係走醬加豉油好啲~~~~

小時候的味道~聖安娜餅屋~

一件細個層經食到帶點抱怨的西餅，
係陀小立期間突然很想的味道。
原來而家好多餅店都無做了。
大家都轉向色彩繽紛的果撻或者切餅。
老公找了好幾間終於找到了！⋯⋯
黃梅果醬蛋糕 以後想起來的時候就知可以在那裡買了！！

蛋糕底鬆軟，側邊的椰絲令口感層次豐富
而蛋糕中層的CREAM薄薄一層不會太膩
CREAM不太多唔會食到一咀都係，滑身不太甜
黃梅果醬酸酸甜甜令人回味

值得一提，職員服務態度良好，唔好因為人龍太長或者客人選擇時間耐而黑面
(因為當天有客人揀西餅好似揀老公咁精挑細選~~哈哈~~~)　

濃汁~勝利牛丸~

好耐都無食呢間啦~~~~
一來你幾點去都係咁多人，你自己一個都叫易搵位，多幾個人去又要等
二來人多坐位就自然無咁寬敞架啦
但近日在回味呢間既濃汁就買個外賣食啦

外賣如果怕番到屋企會無曬湯的話，
可以加錢分湯的啊!

信義妹最鐘意就係食牛丸牛筋油麵啦
呢度係無生麵或者粗麵架
牛丸夠彈牙，一咬肉汁慢慢流出來
牛筋夠稔身，如果喜歡有咬口既朋友就未必覺得好啦
有黏黏的口感，充滿五香的味道
而麵唔會太軟，油麵掛上濃濃的汁增添美味
湯汁濃郁，充滿牛與五香的味道，唔會因為鹹而蓋過五香
味覺層次豐富~~~

嚇人的~19週~

今週驚到有點不知所措.....................
突然啡小姐，紅小姐又來訪.........................
乜唔係過咗三個月就穩定了嗎?
你地去錯地方吧????/
今次量都唔少......................你地唔駛帶咁大隊人來既
我絶對唔想招呼你地
你地坐坐就好走啦~

整週都在心驚膽跳的情況下過
當中有多少人明我的心情

有人叫我入院睇，睇來把鬼咩
之前嗰幾次都係咁啦
乜都做唔到，仲送你一句，係呢個情況下保大唔保細，你自己考慮
人地都做到盲目架啦

再唔係就同我講，你自己到時就後悔架啦
真係想爆句粗口，再加，家下我點會唔緊張，我捱了忍了多少才走到呢一步
你眼睇好似一陣子的事，對我來講，我忍了多少才能來到這一刻，你覺得我在自暴自棄嗎
原來你一啲都唔了解
唔了解，就唔該你收聲

再發現原來今次要受的壓力彷彿都比上一次大
是因為完全熟悉流程跟事態發展
還是到目前為止只有雙方父母知道，沒有人傾訴的關係嗎...............................
真係嬲到想爆樽!!!!

　

大愛魚湯~小魚滋味~

係尖沙咀做完野，思緒徘徊係番屋企附近食好呀，定係係尖沙咀搵野食
邊諗邊行，行行下就見到小魚滋味
好啦~~~~ 就試下啦~~~
叫了個午餐~~
多少都有啲失望
因為係水煮牛拼墨魚丸烏冬
初初一心諗住水煮牛會係紅油滿面
辣椒滿瀉既情況
點知來到係醬汁極稠的辣醬撈牛肉
只係牛肉算滑
再睇墨魚丸得一粒!?!?!?!
好彩再搵下碗底仲有兩三粒
咁既份量都算多啦~~~~
墨魚丸無咩大特色
有條小棠菜伴下有少少健康啦~~~
哈哈哈
烏冬無灼得太稔，口感可以接受
重點既魚湯夠濃味
啖啖鮮魚汁，但無腥味
鹹度適中
愛湯既我真係想再來一碗!!!

抵食之選~大家樂~

周邊既茶餐廳少下一間、少下又一間
就算有人接手重開，都會眨下眼做唔住
真係世界難撈啦~~~
連周邊既茶餐廳早餐都最少三十蚊先有交易既時候
大家樂就推出$25特價早餐
即時吸引長長的人龍
廿五蚊有個細米粉，有三文治，仲有埋熱飲
真係唔係度度有
最少我住附近就難搵少少啦~~~
味道呢~~~
榨菜肉絲粉
榨菜唔太鹹，偏軟身，無咩咬口
粉米唔淋，湯就淡味
如果喜歡濃味的，就會覺得偏淡
但信義妹都覺得ok 啦~~~

今次三文治係推蕃茄碎蛋三文治
向來三文治我都唔太鐘意蕃茄碎蛋
因為有啲地方係會有勁多沙律醬
呢份就沙律醬份量適中
沙律醬只係僅僅黏住碎蛋同蕃茄
唔會有糊糊的口感

熱飲就普通啦~~~~~都係平時飲開嗰啲~~

芝士飯~富士山55~

有日朋友提起有間食拉麵仲有芝士飯的好食
作為芝士控的信義妹梗係成日心思思想試下啦
終於有日係附近做野就約埋朋友去試下

信義妹點了特濃豚骨沾麵
麵有得揀軟硬程度，揀了適中
豬肉就唔太鹹
溏心蛋就一定要沾湯食才有味

湯底濃郁，果然係特濃
沾上麵，掛湯令到麵更好味
如果吃不慣濃味的人就唔好點啦
始終會偏鹹一點

白湯豚骨拉麵
只試了湯底，有家常豬骨湯的感覺
不太油
鹹就相對適合淡味既朋友啦

呢個芝士雞軟骨...............
絶對可以唔駛試.................
極度失望...........
雞軟骨似雞丸........完全無咬口
芝士............無香濃的味道

 到最後梗係將沾麵汁加飯啦
WOW!!! 呢個係成餐最好味的一個
芝士有拉絲的~
飯跟汁濃濃的混埋，完全令人回味