到娘家CAMPING~22週~

適逢屋苑唔知幾年一次既大檢
全屋都無電無水..................無到連雪櫃都要清倉
好明顯係要信義妹打爆埋娘家個雪櫃啦.......................
既然係咁大工程就索性到娘家CAMPING 一星期
WOW!!!!! 最開心就一定係小卷
有多幾個人陪玩之餘，仲有多地方走動
去到娘家，小卷就日日唔願訓
每日都想將所有玩具玩一次
信義弟一到放假就帶埋小卷出去跑一下
真係散曬.........................
不過暑假就係要那麼充實
希望日後唔駛係溫書中渡過啦..................................　

蝦籽撈麵~劉森記~

話說有日同信義爸提起，好耐都無食過劉森記既蝦籽撈啦
果然前世情人既威力影響下
轉眼間就有呢個外賣做晚餐啦~~~
哈哈哈~~

都係食番薑蔥黑栢葉蝦籽撈麵
勝在薑蔥夠多
黑栢葉整得爽脆
切到幼身唔會因為太大舊要咬好耐
最重要的係蝦籽夠多
整整鋪滿成個麵
令到每一啖都有蝦籽的鹹香

不過每次食都有少少煩惱
就係如果唔加湯就會太乾
加咗湯就會沖走曬啲蝦籽
不過今次係外賣就唔怕啦
到最後會加多少少湯飲埋啲蝦籽
堂食因為用碟............基於要顧及儀態............
總不能舉碟共飲吧!
哈哈

與其話期待下次再食，應該話信義妹期待下次再同屋企人食
**喜歡吃醃蘿白的，記得要食!! 每次信義妹都食好多架~~~

番本~番本日式放題~

放題~~真係好耐無食啦~
成日都要搵個可以唔駛理儀態既朋友一齊真係唔容易
陣間見信義妹食得咁瘋狂嚇親就唔好啦~~~
哈哈

難得有人陪就一於放題一下啦~
下午就已經放題，睇來我地兩個係超餓底~
呵呵~~
朋友介紹去番本~~反正未試過一於試下啦~
我地BOOK 咗12點
呢個時段不太多人
我地先點一輪刺身先~~~
唔知係咪好耐無食放題呢~~~
呢度有象拔蚌刺身啊!!!!
象拔蚌鮮甜爽口
甜蝦夠大隻
三文魚肥美
雖然帶子略細，但係鮮甜攞滿分

海鰻芝士卷
鰻魚就一般般，太薄啦~~~肉質亦都有少少鬆散~~~
但係內裡的芝士卷味道濃郁，都不失為一個選擇

北海燒蠔
蠔比想像中大

味道鮮甜，當中有厚厚的芝士襯托
芝士控的信義妹大讚

XO醬墨魚咀~~
呢個不太辣，無雪味
墨魚咀爽口，鹹度適中
如果可以辣多啲就更好啦

火炙三文魚跟芝士玉子壽司
火炙三文魚魚油豐富，食入口口感豐盈
芝士玉子，玉子就略甜，但係芝士的鹹香混合就剛剛好啦

鹽燒海老
蝦有手掌差不多大架!!!!
殼外面有少少鹹，肉質有彈性，有海鮮的甜

天婦羅蝦
炸但入口不油，內裡的蝦亦都唔會過咗火

當中亦都有不同手卷選擇
手卷既份量唔算大份，可以試多幾款口味

牛舌，呢個我地ENCORE咗好幾次
入口軟滑，
鹹味剛好

牛柳粒
牛柳軟，易咬開
一件一口放便食
味道鹹中帶少少甜
都唔錯呀!　

燒元貝
有蟹籽、芝士加沙律醬做汁
醬汁面焗到有少少燶更加香口
元貝雖然細咗少少但係唔會整到變乾

仲有烏冬、湯其他熟食選擇
款式多樣化
另外飲品同甜品可以自己拎
有汽水、紙包飲品同樽裝飲品都有
甜品有芒果布甸同牛乳布甸，仲有雪糕同雪糕糯米糍添~~~~

持續輕盈~21週~

好!真係好日都望自己輕
唯一唔望自己輕既時候就偏偏輕
繼之前輕5磅之後就再輕多磅
日後減肥有咁成功就好囉

產檢的時候，小立增長不錯
好呀!即係係我唔夠唔係小立唔夠啦
小立唔駛同阿媽慳架，繼續努力
食多啲，食多啲，食多啲啦!!!!!

終於來到照結構的日子
小卷的時候都未有咁緊張
而家到小立的時候，竟然會訓唔到!?!?!?!
係咁啱，定真係緊張呢?????
反正呢次都成日唔訓覺....................
無所謂吧
當然， 小立健康，當醫生想透露性別的時候
信義妹叫住了......................
不用透露，只要健康就係最好的，不論仔女我地都錫
醫生都呆了...............可能年中俾人問性別問到天荒地老...............
信義妹跟六仔係少數對性別亳無興趣的
大家請等等吧! 等到小立出世，大家就知啦~~~

　

　　　　　

湯底出色~冬陰公公~

好耐都無同閏蜜一齊出外啦
大家都有家庭之後都各有各忙
邊有咁多時間呀
電話都少聯啦
難得大家都可以出來抖下氣，就梗係把握機會啦

本身唔係去冬蔭公公既
但係唔知點解想去嗰間執鬼咗
咁就錯有錯著去咗冬蔭公公啦

入到去見到選擇都多既
信義妹就揀咗冬蔭公湯底加金菇
選咗中辣
麵底就揀咗薯粉
一來到就有多少失望既
淨係睇表面就覺得無咩餸............
原來餸係要尋底架
係底埋咗唔少金菇
特別要一提係花生
花生夠香口，真係想問下可唔可以添多兩匙俾我~~哈哈
湯底多少有驚喜
平時飲冬蔭功湯好多時未來到就已經聞到好濃既香料味
呢個聞就唔係好聞到
所以初時都係諗住應該都唔太濃味架啦
點知一飲，就飲到香茅、檸檬葉既香
再試到少少的辣
下次一定要叫大辣試一下先~

豆之美味~亞婆豆腐花~

朋友難得出城就梗係要聚下架啦~~~
我都知衰架啦..............遲咗出門口
所以朋友就係火車站附近行
一行就出事啦~~
出事係..............我地正餐都未食.............就要食甜品
哈哈哈~~~
雖然我都諗住帶朋友去食亞婆豆腐花既，不過係食完正餐先囉~~~
唔梗要啦~~而家調轉都無問題，反正甜品向來都係第二個胃~~~
哈哈哈!

我就點咗熱花奶豆腐花$13
今次食既同之前有唔同豆味比上次濃
唔通因為上次係食凍的關係..............
花奶加豆腐花就算唔加糖都有種清香甜美
對於唔太嗜甜既信義妹來講就足夠了
但如果想更甜就可以選擇加紅糖
豆腐花口感幼滑

朋友就點了芝麻豆腐花$14
芝麻粉令到豆腐花多一種芝麻香
朋友是芝麻控食得特別開心
豆腐花的滑加上芝麻粉的粗令口感多一種層次

食完豆腐花朋友覺得唔夠
所以仲叫了兩支豆漿
每支$12
有杯裝的，但係我地怕飲唔曬就樽裝比較方便
豆味香濃
甜度適中，對於不嗜甜的我地就剛好啦!!!

到走嗰陣朋友突然見到綠豆餅
店員跟我地推介要試下
都好~一於試下啦~~
細的$11

果然無推介錯，
如果你地係喜愛老婆餅那一類的就要試下啦
外層做得好鬆化，皮一啲都唔厚
內裡豆餡豐富，甜度算係甜，但未致於偏甜
我地一人兩個三爬兩撥就食曬啦~~~

下次我想買一樽腐乳試下
店員話係佢地自家制架~~~~

輕了~20週~

今次我個肚並不像之前的人講

第二胎會大過第一胎~

我是相反，第一胎大過第二胎

現在才36吋

對比起之前差好遠囉

所以度起上來都沒有上次那麽起勁

始終上次是巨肚

今次相對適中了吧

六仔就永遠都說有大呀! 唔錯呀!

信義妹今次連影相都要就啱角度先可以影到個肚

所以只可以話今次小立把自己都收得好好

更令人迷思的是..............................

輕了.......................仲輕了5磅有多...................

實在奇怪..............

但產檢的時候，小立重了，換句話即我輕了

感覺又幾好喎

小立，你唔駛留俾你媽的啦~~~~~ 盡食啦~~~

你重就得架啦!!!! 哈哈哈

經濟下午茶~大家樂~

唔知係咪因為要儲肥過冬.................
近期長期都餓底...........　
食少啲都會好似食咗陣風落肚咁......又要再食過

今日好明顯係餓底發作
要去買番個TEA 先可以等到夜晚
如果可以越食越瘦就好啦~

又去咗大家樂
好野!!! 今次終於買到燒鴨瀨茶餐啦
平時好快就賣曬架啦

瀨粉
軟硬度適中唔會過軟
不過就唔係好吸到湯汁
所以略淡

燒鴨
皮脆肉算嫰亦唔肥膩
皮帶少少鹹
肉就唔太有鹹味，反而食出鴨的肉香

附送的青菜就老咗少少
不過送既就唔好嫌咁多囉~~~哈哈哈!

紅豆冰~大家樂~

話說有日信義妹好想飲紅豆冰

奈何週圍只有大家樂先有

唯有等到下午茶時段就去買啦

去到發現到正野啦~~

炸脾加紅豆冰做梗優惠 $25

可惜只有四週

即係仲有幾日就無啦

如果有得繼續就好啦

炸脾

個人認為炸得太乾啦

側邊位全部變曬雞乾

好彩中間都仲嫰滑，中間部份味道超好

因為唔會過鹹，肉汁仲會流出來，肉質夠滑

皮脆帶少少鹹味

紅豆冰
粒粒特大的紅豆
軟稔但不糊口
味道不過甜
花奶加紅豆絶配的組合
可惜就冰多咗少少
少啲冰就更好啦

黑椒豬肚~龍苑~

龍苑都可以算係信義家當叫外賣的地方
今晚突然有朋友自遠方來
所以要嗱嗱聲加多少少餸
龍苑都不失為一個好選擇
就加個黑椒豬肚啦

雖然呢味信義家未點過
朋友見到話想試就試下啦~

未打開盒就已經聞到陣陣黑椒的香氣
一打開就已經食指大動
忍唔住偷食~~~哈哈
熱哄哄的豬肚，份量夠多
無雪味，同埋唔會過鹹
鹹味適中，黑椒味濃
唔食得辣既朋友試就要諗一下啦
另外有配菜的蔥有大量
可以當菜食~~~哈哈哈
汁沒有太多
多汁的話我地應該撈埋飯添
呢個下次一定要再ENCORE!!!!

不過呢幫你落單既店員有時都會火氣猛架~~~

可能呢度鑊氣夠啦~~~

哈哈哈