很想偷情~31週~

信義妹確實想偷情
想跟周公偷情.....................
實在太累啦....................
當你想瞓就無得瞓................
當你無得瞓就係咁想瞓
我已錯過了很多偷情既機會啦
俾少少我同周公偷下情啦..................

另外，開始有少少尿浸既問題
今次對比小卷那次遲了出現
應該是小卷嗰陣肚太大所以早出現呢個問題
今次算賺了吧

驚喜之麵~張榮記蝦子麵~

信義妹去到麵店通常都會叫河粉
因為覺得麵好多時都會有鹼水味
所以絶少叫
今次因為有朋友特意帶信義妹到店一遊
仲揚言唔好食搵佢算賬
結果今次係好食要搵佢算賬!!!!
咁遲先話我知!!!哈哈

點好食呢~
蝦子味濃
蝦子混在麵中
鹹鮮味香
麵只需兩三分鐘就可以速食
麵質彈牙爽口
完全沒有鹸水味
以食過某兩間以麵為出名的店
呢間為最好食

好味的麵當然要配番自家制辣椒油就更正啦~~~~

貓奴天地~貓咪貓咪HOME~

以往去開港島的貓咪CAFE
但係而家成日都一家幾口就真係坐唔到咁耐車去啦
小卷係特別喜愛貓咪
唔知佢大個係咪想成為貓奴啦...................
所以有朋友提議不如去近啲的貓咪CAFE
信義妹真係好耐無出城啦..........
連係旺區有都唔知

一去到~~~人山又人貓海~~~~
要排住入座啊~~~~
安排座位後貓咪很會討人歡喜來霸你位置

睡得相當甘甜啊~~~~~

食物雪糕未食就俾人搶咗啦~~
哈哈哈~~應該相當好味吧!
心太軟就......................有改善既空間.........
外層太硬了............內裡亦無流心的效果
朱古力味濃
芝士蛋糕餅底不太甜
蛋糕鬆軟，可以一試

雲石蛋糕芝士味濃，口感鬆軟
焦糖燉蛋，焦糖略為少了一點
脆口的部份都少了
燉蛋不太甜，尚算滑

洋甘菊花茶對於平時叫飲品走甜的信義妹來講都算可接受
但玫瑰花茶對信義妹就偏甜了一點
友人就覺得剛剛好啦~

這間原來有大約十幾廿隻貓咪，一眾貓奴去衝去吧!

後期徵兆回來嗎~30週~

陀小卷嗰陣，信義妹係典型嘔到生既孕婦
去到產房訓上床都仲嘔梗
嘔埋最後一次先生
連助產士都話..............乜你真係嘔得咁誇架
所以今次信義妹都有齊心理準備，嘔到生架啦
中期的時候有少少好轉既
但係會有暈既情況

到了這週，反胃又嚴重了
點反都嘔唔出.................睇來呢個係小立既特色
呼吸嚴重唔暢順
我都唔知自己因咩條氣唔順....................
又有啲突然醒曬，突然眼訓既情況......................
唔通淨低既10週都係咁....................
關節比之前更加唔順
唔知就以為自己會散曬
恥骨係勞動過後會更痛.................
完全真係唔知自己想點....................

抵食之TEA~EAT ME BAR~

朋友係要出來聚下既~

今次信義妹仲要一家幾口都出動埋

真係大袋細袋咁出動

去到餐廳位置都尚算寬敞

我地一家四口再加兩個朋友

又手袋又背包都坐得輕鬆

環都算唔錯

一坐低餓底又來啦

叫咗好幾個TEA SET

烟肉卡邦尼意粉

醬汁CREAMY

意粉爽口，烟肉不太鹹容易入口

黑松露雞柳忌廉意大利飯

飯有咬口，唔會有半生米

雞柳都算多

黑松露香濃與忌廉既搭配，真係信義妹大愛

水牛城雞翼配薯條

信義妹略嫌雞翼未夠辣

但有朋友就覺得小辣

不過小小辣加上蕃茄醬汁就提昇了味覺層次

薯條為厚切，外脆內軟

小食拼盤

有天婦羅蝦，雞翼、芝士雞柳、薯條、司華力腸

最吸引既係芝士雞柳

芝士味濃，雞柳軟滑

飲品方面紅棗茶跟柚子蜜

對於我地來講略甜

紅桑子荔枝梳打

顏色好美

朋友話唔似藥水味

下次都要試下先~~~~

手作週~29週~

信義妹愛手作

小卷都整了不少

被仔衫仔鞋仔裙仔

今次未知性別

但無減我對手作既熱情

照整被仔衫仔裙仔

係...............大家無睇錯.............裙仔...............

呢度無劇透性別

只係信義妹諗住有殺錯無放過

兩個性別都整一啲

到時唔中的一方，一係變賣，一係送人

信義媽就超驚

每當信義妹整到粉紅色的時候

信義媽就會話知係女啦?

信義妹就會唔客氣咁講句 整得咁靚到時仔都要佢著下影下相

有次信義妹整了花花帽

信義媽問邊個朋友近期生咗女呀?

我話無呀~我諗住小立係仔係女都要帶一下呢頂~~ 真係整得好滿意啊~~~~呵呵呵

跟住信義媽..................靜靜地係廚房拎咗個沙田柚出來

到時小立係仔既話你就拎呢個影就算啦.........................

　　

產檢週~28週~

這週真忙
政府私家兩邊走......................
差點兒全部都撞期

政府上次遇唔到冏冏醫生
今次遇到冏冏助產士
整個檢查都係專業細心的
唯獨去到交談既部份
助產士：你來檢查邊個幫你睇住大嗰個呀？
信義妹：婆婆呀
助產士：平時都係婆婆睇架？
信義妹：係呀！要番工
助產士：咁第日呢？
信義妹：可能自己湊啦
助產士：咁你會好辛苦架喎
信義妹：應該都可以既
助產士：你要諗清楚喎
（來到呢句。。。。我真係唔知自己點接落去。。。。我係咪應該應佢咁叫婆婆一湊二囉。。。。唔通老人家湊就唔辛苦。。。我呢啲點都後生信義媽幾十年就辛苦咩。。。。以前一個湊七個都係咁。。。。如果自己湊到，梗係自己湊啦）
信義妹：啊～～諗諗啦
助產士：要快啲決定架啦
（睇來佢仲心急過我。。。。其實佢係咪想叫我請工人，跟住有介紹俾我呢？？）
信義妹：好呀好呀。。。。。

好快就走啦～～～　唔駛等到天荒地老真好～～～
今次驗既時候，有點兒奇怪，第一次糖尿超標，第二次無。。。。
結果當然俾人話我無洗乾淨個樽呢樣嗰樣啦。。。。

到私家產檢
轉醫生後感覺好多了
檢查的事項多了
不過小立就仍然經常性遮住臉
搞到信義妹好似條煎魚咁俾人反左反右都唔係好睇到個樣
小立，我地只想保持性別的神祕，你就俾我地睇下似六仔定似我多啲啦　

第二胎易上奶~27週~

有好多人都同信義妹講第二胎易上奶
但同信義妹講嗰啲人全部都係未生小朋友既................
所以我都一直都覺得OK 啦
正常有第一胎經驗，第二胎既時候應該會更好都正常
不過我就真係無諗住咁快.................
記得上次小卷那時都要去到3X週先開始會有分泌
估唔到今次27週就有啦.................
嚇得信義妹半死...............
因為小卷係信義妹開始有分泌無耐就出世....................
觀察自己幾日無異樣都算放心了一點
小卷睇來可能知道將會有人奶咁，表現得很開心
好彩我都有準備將來要餵一大一細
眼見餵人奶小卷確實健康唔錯，就你願食，我願餵啦

見到有個節目，女人多自在
講在職人奶媽......................真係睇一次就傷心多一次
當中句句到肉，刻骨銘心
公司唔支持餵人奶
信義妹日日早個幾兩個鐘番工
泵一次，再補一個鐘俾公司
因為之後會係公司再泵奶，免得招人話柄
唔出街食飯，利用埋食飯時間做野同泵奶，期望所有野唔會因為我而遲
即使你點做................公司唔支持就唔支持...............
公司既鞋王總會有意無意好似想挑你機咁......................
心裡總會難過
有幾多個真係明白當中感受
好多人口話支持，但行動唔支持
好多人質疑你既能力
但好多時係你地一早就標籤咗餵人奶係阻礙工作能力
多少事都只能眼淚在心裡流呢............................
　　　　

難飲糖水跟講座週~26週~

今週終於有得聽講座啦
比起小卷那次，我跟六仔好似都不太起勁去報講座
可能一來諗住多些時間陪小卷
二來每天都好似有好多東西要處理

先分享智多健講座
呢個係信義妹笑住口去，黑住面走的一個講座
講座內容HARD SELL，
媽媽生完或者陀BB 既時候無記性，食藻油丸啦
老人家無記性，食藻油丸啦
總之每一樣野，都可以關到佢地既產品
我明白，去得講座唔通真係淨係俾資訊同禮品你咩
天下間無免費午餐
但係銷售方式完全要改善，而俾既資訊亦都過於表面，
基本佢講既，好多人一早就知，或者已經聽了幾十次
咁到你一講，就淨係會覺得你SELL 啫................
講座我聽唔少，呢個算係最差既一個
HARD SELL 都算啦~~~~
到走既時候，門口派禮品的姨姨就最令信義妹火大
連門口派禮品的姨姨都會重新SELL 你一次
真係辛苦....................
排信義妹前幾位有個媽媽，淨係睇佢個肚就覺得應該就生.................
(除非係孖胎，拍得住信義妹陀小卷嗰陣)
門口派禮品姨姨就話啦：睇來就生啦！
前幾位媽媽：係呀！你睇得出呀！
（呢位媽媽應該係第一胎。。。。。你籮咁大個肚。。。。係人都估你就生啦。。。。）
門口派禮品姨姨：係呀！我估呢啲好準架，上次我又係咁同個客講，個客過兩日就生啦
前幾位媽媽：係！咁都唔錯
門口派禮品姨姨就每個人都傾下，每個人都SELL 下
到信義妹啦~
門口派禮品姨姨：Ｅ！你都生得啦喎！
信義妹：（已經不悅地回應）唔係
（心諗，已經想車巴你架啦，你係咪發雞盲架，我交番問卷俾你嗰陣填埋預產期架啦！你淨係接咗無睇就係度估，家下我幾週呀！生得！係咪未俾客車巴過架！）
門口派禮品姨姨：啊！就快啦仲有一至兩個月
信義妹：（更加不悅）都話唔係囉
（你條友係咪作死既啫，你有幾何見到個客俾你咁講之後黑住面咁應你架，你醒既就轉話題啦！再唔係就睇番份問卷，我嗰份啱啱先俾你，你放咗係箱面咋！）
信義妹：咁拎得未呀！
門口派禮品姨姨即俾。。。。。
我諗我算係全個講座之中最無禮貌的一個客人
我接受被SELL，但我唔接受你係度亂估我幾時生
一來唔關你事
二來你連基本資料都無睇就想同我拉近距離.................................SORRY 你呢個APPROACH 錯咗

幾日後，我跟六仔就到雅培講座
今次得到很多資訊，亦都互動得多
有教BB 按摩，初生嬰兒常見的情況，胎兒互動交流方法，當然就營養資訊
三位講者都講得有趣
大家都笑唔停
我地都學到新野，可以同小卷小立玩下啦
之後仲有學習區，有營養分析，換片，餵人奶，媽媽奶試飲，陪月分享等
不過呢度我地就大部份都已經知了
就淨係去咗營養分析
當中職員都耐性分析我既情況
重得少可以注意那方面飲食
雖然唔係話幫到好多，但都叫有啲資訊得到

今次同樣都被安排飲糖水
好既，始終年紀大了，都要預防有妊娠糖尿
小卷那時係一個大湯碗
而家就係一樽水樽咁飲
先抽血，就去拎來飲啦
睇來今年有好多有經驗的媽媽
不斷聽到有媽媽話千祈唔好嘔呀.............嘔咗要再約期
呢啲係小卷那時係聽唔到架
信義妹今次仍然要慢慢飲.......................
但眼見有些媽媽真厲害.....................好似飲普通水咁一口氣乾了
今次飲完無小卷嗰次咁暈
唔知係咪機能差咗呢
小卷嗰次暈到企都企唔穩...................
小立今次都暈但未去到企唔穩啦
等夠兩個鐘就再抽多次血
食埋餅，飲埋奶奶就走啦~~~~~~
要等一星期先有結果~~~　
　　
之後都去護協買了一些補充品準備一下
一去護協......................多人到呢.....................
大特價嗎....................
最恐怖係啲唔睇路既人地老公.................
你老婆都大梗肚...................人地老公就唔該你咪發雞盲啦................
你打橫咁企係度...............無人過到架.................轉左轉右都唔該你睇睇有無其他人先
仲有.............你老婆係隔離條行就唔該你跟住啦....................你老婆唔駛係度大叫你買定唔買呀!
(呢個情況.................唔係得一對夫婦係咁..............係有幾對....................都已經地方唔係大架啦......................)

見醫生~25週~

期待的日子來到啦
可以番醫院見醫生啦
QE果然係快，前前後後大約個多小時就走得啦
對比起之前那間.................差太遠啦
其實今次比上次緊張，好彩遇到個正常既醫生
很溫柔的解說，檢查都可以吧
真好，撞不到小卷那次的冏冏醫生
雖然今次已經驗到我有啲指數低
但醫生都作出安排就應該無問題既~~~
所以我要KEEP 住番醫院檢查啦~~~
仲有助產士跟進~~~
好的!!!!不用醫院，健康院兩邊跑

可惜，陀小卷嗰陣係冬天.....................
信義妹都無甩皮....................
今次小立係盛夏.................
我個肚竟然甩皮............................
小卷那時候，因為肚太大..............所以肚底爆下紋都覺得好正常.............
成5X~60吋喎~~唔爆都唔多對路啦
但今次.....................無咁大喎.....................
不過小立唔頂肚底，鐘意頂信義妹肚面.................
所以肚面爆紋
YEAH!!!!!! 一個爆肚底，一個爆肚面，成個肚花曬..............................
你兩個合作無間，GOOD!!!!
每人負責一PART 你媽個肚花曬啦~~~~
咁唯有第日睇下再搞搞啦......................