見醫生~25週~

期待的日子來到啦
可以番醫院見醫生啦
QE果然係快，前前後後大約個多小時就走得啦
對比起之前那間.................差太遠啦
其實今次比上次緊張，好彩遇到個正常既醫生
很溫柔的解說，檢查都可以吧
真好，撞不到小卷那次的冏冏醫生
雖然今次已經驗到我有啲指數低
但醫生都作出安排就應該無問題既~~~
所以我要KEEP 住番醫院檢查啦~~~
仲有助產士跟進~~~
好的!!!!不用醫院，健康院兩邊跑

可惜，陀小卷嗰陣係冬天.....................
信義妹都無甩皮....................
今次小立係盛夏.................
我個肚竟然甩皮............................
小卷那時候，因為肚太大..............所以肚底爆下紋都覺得好正常.............
成5X~60吋喎~~唔爆都唔多對路啦
但今次.....................無咁大喎.....................
不過小立唔頂肚底，鐘意頂信義妹肚面.................
所以肚面爆紋
YEAH!!!!!! 一個爆肚底，一個爆肚面，成個肚花曬..............................
你兩個合作無間，GOOD!!!!
每人負責一PART 你媽個肚花曬啦~~~~
咁唯有第日睇下再搞搞啦......................　　　　
　
　

有營素食自助餐~RED MANGO~

而家多咗朋友喜愛素食
所以都會留意一下素食的店舖
見到而家連素食都有自助餐
一於就拉埋朋友試下啦~~

食物擺設吸引
自助沙律吧
選擇多，沙律菜都有三款
另外仲有粟米粒、車厘茄、豆類等
當中有一款蜜浸梨確實好味
甜係果甜並非人造甜

加上醬汁有三款
牛油果汁、千島汁、蜜糖芥茉汁
其中千島汁同蜜糖芥茉汁都係自家制
信義妹就最喜歡千島汁，酸酸的很開胃

大家咪睇佢有隻辣椒就唔敢試呀
喜歡蒟蒻既要試下啦~~~
這個口感很好爽口彈牙，信義妹很喜歡
不過味道就不太濃，有少少鹹味

呢度有六款菜式
由有車厘茄的那一味順時針說起

芝麻醬凍茄子
入口不油，有淡淡的芝麻香

菠蘿素排骨
入口煙韌，帶少少甜味

泡菜豬碲
呢個係不斷ENCORE的一款
豬碲象真度極高，泡菜辣辣地，味道濃郁

蜜桃猴頭菇
平時信義妹不太愛猴頭菇
因為有啲地方整到咬都咬唔開
呢度就軟稔，鹹度適中
配埋蜜桃就有甜鹹兩者味覺層次

烤豆卷雞槌
外脆內軟，十足雞肉質感
本身帶有腐皮的香甜，
另有泰式酸辣汁俾你自己沾

黑椒牛扒
又係極似真牛扒的素食
帶少少鹹，沒有太多調味
黑椒汁亦係另上，自己喜歡多少隨意

其中有一個素元貝有幾款味道
只試了當中的芝麻味
濃濃的芝麻香外，還有少少鹹味

湯品跟甜品是信義妹最愛
有一個合掌瓜湯
超清甜，跟朋友每人都飲了兩三碗~~
哈哈

另外遇有冬蔭功肉丸湯
雖然無海鮮既鮮甜，但充滿椰香
還帶一點點檸檬酸
肉丸口感像貢丸一樣

有一樣大家都要留意既
就係有一款係要落ORDER 先有既肉醬意粉
肉醬不會因為蕃茄而過酸
意粉亦都爽口唔會太淋

飲品方面
有不同的即沖飲品
有咖啡，茶、等
當中信義妹就比較喜歡呢款桂圓紅棗茶
甜度適中，桂圓味香

到最後梗係要食埋個甜品作為一餐的完滿指標啦
青蘋果乳酪
自己食幾多裝幾多
酸酸甜甜最啱食到飽飽後消消濟

以午餐自助餐大人$118
有多款選擇都實在算不錯~~~~~
下次要拉埋信義媽去先~~~

要說了~24週~

本週節目豐富
去了睇龍貓專門店
小卷開心到不得了
最叻既係無扭計要買野
睇完就會放低
不過見到隻大龍貓同貓巴士就不斷要影相
都好既~~~影相留念
六仔就攰啲，不斷抱上抱落

跟住再過斜對面望望姆明
可能小卷無睇過，興趣不大
望兩眼就走番去睇龍貓

我地成家係商場走來走去
最後終於換到個限量版3週年襟章
原來呢個襟章好多大人小朋友都儲
每日只有30個換完就無架啦
當日仲有日本原聲來演唱龍貓主題曲
完全逼爆人
對於信義妹關節開始不太靈活來講，真係超額完成了所有項目

今週亦都公開懷孕消息
好~~ 今次人相當冷靜，無追問仔定女
問題符合預期
其實我自己就真係想到生之前先公開.........................
但唔知點解這週總撞到朋友....................
自己公開，總好過朋友之間幫你公開

38吋肚，
話大唔大，話細唔細
但係啲路人甲乙丙，仲係會帶有奇怪的目光打量一下我個肚
查實你地係幫我估梗係仔定女
定係覺得大肚婆係種新奇有趣既動物要睇下??
一係你地就讓座，一係你地就讓路啦! 唔該!　　

呢個星期亦都展現到媽媽group 既威力
有某牌子既new born尿片特價
搞到幾個媽媽group既媽媽叫曬自己既老公去買
哈哈哈哈哈
大家日日都係度交換情報邊度仲有得賣
真係搞到好似之前搶奶粉咁渴巿
有媽媽既朋友以為而家尿片都會好似奶粉咁難求，幫手去買............不過就買咗第二個牌子~~結果將個cost 拉高咗~~~
但嗰位媽媽都開心既，始終朋友都係為佢好
信義妹同六仔有無搶?????
我地只係買咗兩包...................................無其他媽媽一買，就買十幾包...................
無位啦~~~~兩包先啦~~~
　

貴婦式下午茶~OCIO~

OCIO一間常光顧的餐廳
一來方便，二來食物質素唔錯
自從上次坐過ONE PIECE CORNER之後
成日都想再坐多次
不過今次唔得啦~~~安排唔到~~~
好呀!又俾個借口我，得閒再去多次~~哈哈哈
原來門外的熊仔擺設係好多小朋友經過都要拍照留念

今次坐餐廳的另一邊西式的報置

信義妹成日都想AFTERNOON TEA一下架啦
不過就成日都搵唔到腳去，唔係各有各忙，就係時間唔啱
今次一於就同信義媽一齊扮一下貴婦先啦
一去到唔理啦~~就點咗個TEA SET $138
等咗陣就來到啦~
當日見到十枱有九枱都係食呢個

先講下最底層先
沙律菜
新鮮爽脆，無苦味

薯條
外脆內軟而不油

三文魚班尼迪蛋
煙三文魚加上菠菜同班尼迪蛋
呢個鹹味剛剛好，
切開時蛋汁沾滿麵包
蛋亦都唔會太生

黑松露芝士酥皮撻
酥皮鬆化，牛油味濃
內裡芝士雖然唔太多
但內裡有兩種不同芝士的味道
加上黑松露香味的點綴
令呢款鹹點味覺層次再提升

什果芝士蛋糕
蛋糕同CREAM CHEESE配合得好好
唔會太多CREAM CHEESE
若果生果可以再多啲就更好啦

迷你雪糕甜筒
呢個係一來到就一定要食先
有綠茶同雪尼拿味
雪糕筒就脆口
不過就細咗少少
哈哈~~~

原味窩夫
外脆內軟
蛋味香濃
無特別的甜味
唔嗜甜既信義妹唔加糖醬都好食

馬卡龍
呢個對信義妹來講就一般般
因為味道偏甜

拿破倫
內裡有吉士醬，甜度適中
不過可能我地食得慢
夾層就比較淋

朱古力士多啤梨
呢個就無特別
士多啤梨沾上朱古力醬

黑松露野菌闊條麵
食完個TEA SET 仲覺得有空間
就食多個闊條麵啦
麵質爽口，唔會太淋
野菌夠多，唔會食兩啖就無曬
黑松露味濃，同野菌相互影響下味覺層次提升

LATTE
LATTE 另咖啡味香濃，奶同咖啡比例正適合信義妹需要
最後以一杯LATTE 作為結尾~~~
感覺相當美滿

好想下次再HIGH 多次AFTERNOON TEA 啊!

有驚喜的~23週~

媽媽GROUP 係世上最強的GROUP
(至少目前我都十分佩服各位媽媽)
特別係WHATS APP 真係感受最深
稍為無為意個電話...............轉眼間就可以有成千個Message
不論大少優惠，自組團購都有
真係追POST 都要花一段時間

早前係媽媽GROUP 得知QE開始安排一些媽媽可以早啲見醫生
我太遲了...............先前被安排33週才可以見醫生
當時我的反應都嚇到助產士.................
因我高聲地"就生先有得見?"
不過我仍然堅信QE一定比之前的那一間好的!!!!
所以呢幾日都心思思地留意住電話，睇睇自己是不是其中一個幸運兒
好野!!!!! 信義妹是其中一個
25週就可以見醫生啦!! 比起小卷那次都唔係遲好多

唔知係咪開心得濟呢.........................
當晚發夢...........
竟然係發夢自己再一次好似生小卷嗰陣.....................
被人手穿水..................
最慘既係人手穿幾次都穿唔到.....................
又俾幾個助產士按住手腳.............正宗肉隨鉆板上................
最恐怖係....................係個夢到好似唔識醒咁...............
最後係叫醒.......................一醒成身都係汗...................
差啲叫醒曬全家...................
睇來小卷那次都嚇得幾深.................
下次發夢千萬唔好發俾人人手清胎衣.....................
唔駛每個情節都remind 既.............................
我記得程序架啦...............................

到娘家CAMPING~22週~

適逢屋苑唔知幾年一次既大檢
全屋都無電無水..................無到連雪櫃都要清倉
好明顯係要信義妹打爆埋娘家個雪櫃啦.......................
既然係咁大工程就索性到娘家CAMPING 一星期
WOW!!!!! 最開心就一定係小卷
有多幾個人陪玩之餘，仲有多地方走動
去到娘家，小卷就日日唔願訓
每日都想將所有玩具玩一次
信義弟一到放假就帶埋小卷出去跑一下
真係散曬.........................
不過暑假就係要那麼充實
希望日後唔駛係溫書中渡過啦..................................　

蝦籽撈麵~劉森記~

話說有日同信義爸提起，好耐都無食過劉森記既蝦籽撈啦
果然前世情人既威力影響下
轉眼間就有呢個外賣做晚餐啦~~~
哈哈哈~~

都係食番薑蔥黑栢葉蝦籽撈麵
勝在薑蔥夠多
黑栢葉整得爽脆
切到幼身唔會因為太大舊要咬好耐
最重要的係蝦籽夠多
整整鋪滿成個麵
令到每一啖都有蝦籽的鹹香

不過每次食都有少少煩惱
就係如果唔加湯就會太乾
加咗湯就會沖走曬啲蝦籽
不過今次係外賣就唔怕啦
到最後會加多少少湯飲埋啲蝦籽
堂食因為用碟............基於要顧及儀態............
總不能舉碟共飲吧!
哈哈

與其話期待下次再食，應該話信義妹期待下次再同屋企人食
**喜歡吃醃蘿白的，記得要食!! 每次信義妹都食好多架~~~

番本~番本日式放題~

放題~~真係好耐無食啦~
成日都要搵個可以唔駛理儀態既朋友一齊真係唔容易
陣間見信義妹食得咁瘋狂嚇親就唔好啦~~~
哈哈

難得有人陪就一於放題一下啦~
下午就已經放題，睇來我地兩個係超餓底~
呵呵~~
朋友介紹去番本~~反正未試過一於試下啦~
我地BOOK 咗12點
呢個時段不太多人
我地先點一輪刺身先~~~
唔知係咪好耐無食放題呢~~~
呢度有象拔蚌刺身啊!!!!
象拔蚌鮮甜爽口
甜蝦夠大隻
三文魚肥美
雖然帶子略細，但係鮮甜攞滿分

海鰻芝士卷
鰻魚就一般般，太薄啦~~~肉質亦都有少少鬆散~~~
但係內裡的芝士卷味道濃郁，都不失為一個選擇

北海燒蠔
蠔比想像中大

味道鮮甜，當中有厚厚的芝士襯托
芝士控的信義妹大讚

XO醬墨魚咀~~
呢個不太辣，無雪味
墨魚咀爽口，鹹度適中
如果可以辣多啲就更好啦

火炙三文魚跟芝士玉子壽司
火炙三文魚魚油豐富，食入口口感豐盈
芝士玉子，玉子就略甜，但係芝士的鹹香混合就剛剛好啦

鹽燒海老
蝦有手掌差不多大架!!!!
殼外面有少少鹹，肉質有彈性，有海鮮的甜

天婦羅蝦
炸但入口不油，內裡的蝦亦都唔會過咗火

當中亦都有不同手卷選擇
手卷既份量唔算大份，可以試多幾款口味

牛舌，呢個我地ENCORE咗好幾次
入口軟滑，
鹹味剛好

牛柳粒
牛柳軟，易咬開
一件一口放便食
味道鹹中帶少少甜
都唔錯呀!　

燒元貝
有蟹籽、芝士加沙律醬做汁
醬汁面焗到有少少燶更加香口
元貝雖然細咗少少但係唔會整到變乾

仲有烏冬、湯其他熟食選擇
款式多樣化
另外飲品同甜品可以自己拎
有汽水、紙包飲品同樽裝飲品都有
甜品有芒果布甸同牛乳布甸，仲有雪糕同雪糕糯米糍添~~~~

持續輕盈~21週~

好!真係好日都望自己輕
唯一唔望自己輕既時候就偏偏輕
繼之前輕5磅之後就再輕多磅
日後減肥有咁成功就好囉

產檢的時候，小立增長不錯
好呀!即係係我唔夠唔係小立唔夠啦
小立唔駛同阿媽慳架，繼續努力
食多啲，食多啲，食多啲啦!!!!!

終於來到照結構的日子
小卷的時候都未有咁緊張
而家到小立的時候，竟然會訓唔到!?!?!?!
係咁啱，定真係緊張呢?????
反正呢次都成日唔訓覺....................
無所謂吧
當然， 小立健康，當醫生想透露性別的時候
信義妹叫住了......................
不用透露，只要健康就係最好的，不論仔女我地都錫
醫生都呆了...............可能年中俾人問性別問到天荒地老...............
信義妹跟六仔係少數對性別亳無興趣的
大家請等等吧! 等到小立出世，大家就知啦~~~

　

　　　　　

湯底出色~冬陰公公~

好耐都無同閏蜜一齊出外啦
大家都有家庭之後都各有各忙
邊有咁多時間呀
電話都少聯啦
難得大家都可以出來抖下氣，就梗係把握機會啦

本身唔係去冬蔭公公既
但係唔知點解想去嗰間執鬼咗
咁就錯有錯著去咗冬蔭公公啦

入到去見到選擇都多既
信義妹就揀咗冬蔭公湯底加金菇
選咗中辣
麵底就揀咗薯粉
一來到就有多少失望既
淨係睇表面就覺得無咩餸............
原來餸係要尋底架
係底埋咗唔少金菇
特別要一提係花生
花生夠香口，真係想問下可唔可以添多兩匙俾我~~哈哈
湯底多少有驚喜
平時飲冬蔭功湯好多時未來到就已經聞到好濃既香料味
呢個聞就唔係好聞到
所以初時都係諗住應該都唔太濃味架啦
點知一飲，就飲到香茅、檸檬葉既香
再試到少少的辣
下次一定要叫大辣試一下先~