舒適~WM CAFE~

到科學園一遊
其實係要同個朋友交收
就借機早一點出門
坐一下享受一下獨處既時光

去了WM CAFE
信義妹係避開了放午飯時間
所以有大把位俾我揀呢~~

餐廳裝修色調和諧
有大電視播小新
朋友話唔係成日有小新睇
好耐都無睇蠟筆小新啦~
都唔錯喎
坐位相距不算遠
在可接受程度

講番食先
午餐都有不少選擇
有辣有唔辣

選了香蒜蜆肉意粉 $65
蜆肉多，無沙
味淡，唔太鹹
蒜味濃，如果怕有口氣既朋友要注意啦~~
意粉軟硬度適中
唔太淋

整體味道，
鹹度適中，蒜香味濃
略乾身
份量比較少

飲品選了熱檸水
無咩特別，正常~~

下次要試下巨BURGER
很多人都點啊!

地址: 沙田白石角香港科學園一期科技大道西5號企業廣場地下S019號舖

極重口味~雲渝軒~

今日經開唔知食咩好~
就試下呢間啦~
第一次
豬頸肉小鍋酸辣米線
豬頸肉鬆軟
唔乾，還帶少少肉汁
肉面有好重手既糖醬
甜甜的痴著
愛甜的應該會大愛
鹹味唔太濃，味道適中
件數都唔算少，算抵食

米線因為無分湯既關係
番到屋企都浸到淋曬
堂食應該會好啲
配料同米線份量都多
可惜實在太太太鹹
鹹到連辣同酸都蓋過

呢個暫時豬頸肉會回頭再點
小鍋米線就應該唔會啦
對信義妹來講太咸啦~
定係今日廚師心情唔好所以重手咗都唔知呢?!?!?!
哈哈哈

地址: 元朗擊壤路17號順發大廈地下C舖

中秋佳節~大家樂~

中秋佳節
原先一家幾口諗住食辣魚麵
點知無開............
再去譚仔三哥又無開
睇來中秋除咗酒樓都幾難搵食

全部人即刻改去快餐啦~
好彩時間尚早，仲有位
信義妹例牌邊爐
各自都點野食啦~

打邊爐最愛都係醬汁
所有醬任大家任撈
豉油瓶好似裝果汁

信義妹離不開辣
越辣越愛
加上蔥同生蒜
提升香味同辣的刺激

丹麥優質豚肉鍋
肉沒有臊味，亦沒有雪味
蔬菜新鮮份量亦都充足
生菜無黑邊發黃
粟米清甜
不過得半件略為不夠~~~~
選了豬骨湯底
跟豚肉更加匹配

大家食完都快快番去賞月啦
雖然雲比較厚
但點都食件月餅
食啲生果啦~~~

地址: 元朗錦繡花園市中心B座地下A號舖

懷念邊爐~FESTIVA大家樂~

俾個朋友問打個邊爐咋，
有咩特別呀?
信義妹只以微笑回應

對其他人去大家樂打邊爐可能係嗰晚無飯開
或者自己一個
或者貪方便先去
對信義妹來講係對陀小卷既過程既一種回億
信義妹有妊娠劇吐症，基本每日都練仙
正宗嘔到入產房，
六仔每日廚神咁煮都搞我唔掂................
唯獨當時大家樂既邊爐令我嘔少一啲
(唔係唔嘔.........係嘔少一啲)
結果有一個月差不多每日都邊爐，換來食到野落肚
而家每次都大家樂邊爐都會有這個回憶
回憶是令人心甜的
(當媽後有夠變態連嘔也變是甜)

FESTIVA的大家樂比一般既大家樂寬敞
裝修都光鮮明亮
顏色和諧

信義妹例牌都會叫邊爐
今次邊爐有個好有氣勢既名
鍋道王   三強海上鮮
點了
虎蝦海鮮穀鉰牛鍋

選了豬骨濃湯
海鮮有蝦，魚，魷魚
用料算新鮮，
蝦彈牙大隻
魚滑厚切
魷魚雖細但夠鮮味

蔬菜盤份量夠多
生菜唔會有黑邊發黃
南瓜甜度高

炸魚皮脆而不油

加了一杯特飲
竹蔗馬碲冰
甜度適合信義妹
唔會太甜
冰就剛好，可能天氣太熱啦~~~~
冰都溶得特別快

飲完一杯唔夠................
好想再飲多杯~
哈哈哈

地址: 銅鑼灣百德新街22-36號翡翠明珠廣場一樓1, 2及5B號舖

麻辣新刺激~FESTIVA米線陣~

天氣熱胃口麻麻好多時都會想搵番少少刺激
信義妹係辣妹就更加離不開辣
見到米線陣有辣食就成為不二之選

睇咗一陣係
麻辣蕃茄肥牛魚腐米線同
大汗豬扒擔擔米線之間淨扎
究竟邊個會辣啲呢?
究竟邊味會令信義妹吃得痛快呢?
爭扎下豬扒打羸肥牛
點了大汗豬扒擔擔米線

大汗豬扒擔擔米線 $43
來到先被麻醬香迷住了
再被辣油香氣吸引
有香氣濃烈既莞茜蓋面
莞茜控一定開心到不得了
湯比想像之中稠
但就因為稠所以能令到每一條米線都能掛上醬汁
令到米線味道不會淡而無味
湯底除麻醬還帶有陣陣鮮甜
米線軟硬度適中

豬扒酥軟
除了面的辣粉
仲有一大片辣油鋪底
辣油仲有脆粒
夾埋一齊食，
口感有多種層次變化
豬扒酥軟，脆粒香口
辣味亦有不同既層次
由辣油既香再去到辣粉既刺激辛辣
不過對信義妹來講就可以再辣多點啦

愛辣的人不妨一試
同場見到有客人食到大汗加細汗
原來大汗豬扒既名係咁來既~~

下次試埋麻辣蕃茄肥牛魚腐米線先~

地址: 銅鑼灣百德新街22-36號翡翠明珠廣場1樓5A及5C號舖

蟹的季節~FESTIVA上海姥姥~

今日要係銅鑼灣工作，所以兩餐都係銅鑼灣解決
但時間又不太多就衝去翡翠明珠貪全層食店同做野地方夠近

去到就俾蟹既餐牌吸引啦!!!!!
又開始大閘蟹的季節
之前陀小立無得食，
而家食少量都無咩問題啦~~~

特上蟹粉小籠包
每件小籠包大小均一
皮夠薄
一咬有大量湯湧出來
湯濃郁鮮味
加上醋更能帶出鮮味

蟹粉扒素鵝
遠遠已經被香氣吸引的一個菜式
埋到來筷子已經忍唔住啦
先試一下無沾蟹粉既
外脆內軟，入口脆卜卜
內裡軟綿綿
鹹度適中，唔會過鹹
再沾上蟹粉就多一份甘香
多一種味覺層次
蟹粉內亦有蟹肉，
鮮味加倍

店內位置較其他分店寛
坐得相對舒適
店員係忙碌仍有禮相待

地址: 銅鑼灣百德新街22-36號翡翠明珠廣場1樓7號舖

店員有禮~EURO GO GO~

有小朋友最驚係遇到唔喜歡小朋友的路人................
因為不論你既小朋友行路跌倒喊，開心笑，
佢地都會給你一個煩厭既樣子
信義妹試過係大排檔一家三口(小卷當時三個月..........)食飯
小卷肚餓喊了兩聲..........真的兩聲
(已經手抱加上埋身餵奶，可以喊多久呢...........)
就糟隔離枱一下凶視加反白.........
唉..........當時心情既灰又想反問.....呢位中女........你未有小朋友嗎?
算啦.........都係講番今次

點解會提到呢件事呢
因為今次雖然係外賣自取
但收銀店員對一拖二的我有禮
當時小卷小立正餓到發瘋
店員仍冷靜為我下單兼安撫一下我的小朋友
可以取餐時更哄小卷幫手拎沙律
唔係喜歡小朋友係做唔到的

所以食物就因為咁全面加分
當然本身質素都唔差

磨菇忌廉湯
香滑中帶有濃濃既磨菇味
味道適中
唔會有草青味

香蒜蜆肉意粉

唔知係咪落錯咗調味呢

呢個辣既...............

因為我個CONCEPT呢個應該係唔辣架.....

意粉唔會太淋

但我就覺得略嫌乾身

乾得意粉都在打結啦~~~~

蜆肉鮮甜，

蜆有十多隻，都算多

蕃茄芝士PIZZA
做特價中
全份都只係$68
芝士同蕃茄味都勁濃
酸酸中帶著濃濃既芝士香
餅底厚薄適中

菠菜龍脷闊條麵
味道偏淡
闊條麵對信義妹來講淋了一點
醬汁豐富，能令每一條闊條麵都沾上醬汁

下次會再試下加$9既芒果班戟
外賣大約要等20分鐘，大家要預留時間啊!

地址: 上水智昌路3號上水中心2樓2056-2058號舖

限時燈籠街~大橋街巿~

中秋就到啦~
大家都準備好月餅、燈籠同生果未呀?
信義妹..............未....................
不過襯近期去燈籠街唔駛過海~~~
就一於去湊下熱鬧先
元朗大橋街巿近來有特色報置
紙扎燈籠高高掛
變成一條燈籠街

當成為一個景點之後呢~~~~~
多人到....................
完全無辦法影到全街景............
人頭倒拍到很多

都係影幾張燈籠照大家睇下
三五成群細金魚
唔知點解見到就諗起波兒

當然都會有大金魚啦~~~
黃色、橙色、粉色
任你揀

仲有海馬
不過海馬突然加曬閃片去開P咁
信義妹自己都有啲睇唔係好慣

海洋生物仲有好好賣的海豚
小卷一眼就睇中呢個
揀咗條細既
(靚相遲下有)

唔喜歡海洋既可以揀太陽花、月亮、星星、荷花、飛機、楊桃、蓮藕

 動物類有兔仔、象仔、馬仔、鴨仔、雞

 總會有一個係你滿意~
雖然今次係短遊，但每個小朋友跟大朋友入到去無一不讚歎

麻辣燙熱潮~麻辣小王子~

近期係FACEBOOK 群組熱捧的店
麻辣小王子
終於找到機會去試啦~~~~~
店不算難找
但星期日不營業呢個大家都要注意啊!

款式多
菜類、豆類、肉類、麵食類都有好幾項選擇
設有最低消費$26
特別食品有豬肺、花膠、鵝腸、雞腸

信義妹點了薯粉
薯粉係粗厚身
食落好滑中間無間雜著沙
(以前試過........食到沙...........係第二間食店)
有加蔥花、蒜泥
配上辣湯增添唔同辣的刺激

選了中麻中辣
對信義妹來講就不太辣
下次可以挑戰大辣或者大辣加辣
亦有要求加醋，但食不到醋味

餸就點了粉腸、萵筍同鵝腸
配上辣
餸沾上辣汁
辛辣的滋味令人一再回味

對信義妹來講份量確實細咗一點..................
食完.............我覺得自己應該可以食多一碗...............
下次再食一定要加底..........又或者.........叫多碗
哈哈哈~

最後，大家一定要預留時間叫
因為信義妹那天外賣最少都要等30分鐘
雖然店很忙，店員仍然耐心有禮
外賣係分湯，所以唔擔心拎到番屋企啲麵會淋曬，影響到口感

地址: 元朗俊賢坊18號權益大廈地下4號舖

慢慢慢活~富臨皇宮~

家人提早做節食飯訂了富臨皇宮
未講食物之前..............
先講講服務
職員有禮，但上菜真係太慢......................
叫起菜最少45分鐘後先上第一道
當上了第一道後，就一下子全都一齊上
應該知我地快餓暈吧
所以一下子除咗飯跟甜品一次過來啦!!!!
我地唔介意一下子上既~~~~

講番食物
食物整體水準不錯

西蘭花蔥爆蝦球蚌片
蝦夠大隻爽口
蚌片厚切但爽脆
味道不會過鹹

龍躉兩味之碧綠炒球
魚肉滑不易散開
沾的粉不多，恰到好處
味道鮮甜美味

龍躉兩味之清蒸頭腩
最正係啲蔥!!!!!
加上少少豉油就帶出魚的鮮

紅燒乳鴿
呢個............信義妹係人奶媽..............
禁忌之物...............
無口福食啦........
拎六仔的影張相當食咗啦~~~
大家話味道不錯喎!!!!
見到大家食得津津有味

紅燒竹笙海皇燕窩
內裡有竹笙、蟹肉、雞脾菇絲、燕窩
味道清，湯不太杰

果皮蒸鮑魚
鮑魚鮮甜，
帶有陣陣果皮香

薑蔥焗肉蟹
蟹偏細
蟹肉亦都略為差了一點
薑蔥量夠，信義妹都食了不少

櫻花蝦海鮮炒飯
裡面就食唔到海鮮啦~
但係櫻花蝦就有大量
飯炒得夠乾身
味道適中，加上櫻花蝦的少少鹹鮮味
呢個大家都想ENCORE

桂花糕
晶瑩的糕點
不太甜
有陣陣桂花清香

下次信義妹再去就會提議第一個到既時候就先叫起菜
等得來就應該差不多齊人食得架啦~~~~~
哈哈哈

地址: 上水天平路48號天平邨天平商場2樓201號舖