信義藍星扎記

2016年3月26日星期六

有心甜品~甜入心~

人大啦~~~~各有家室就越來越難約
終於各個有家室既閏密決定拋夫棄子兩三個鐘啦!!!
女人始終都係敵不過甜品誘惑，所以大家決定用呢次難得相聚機會去食甜品
揀一個大家方便的地點~深水埗~　　
地膽朋友仔話有間介紹，所以我地就嗱嗱聲去啦~

~甜入心~
一入到去已經有良好的印象
因為有免費的花果茶
大家睇到呢一刻，一定係覺得我係一個貪小便宜的人啦~
但大家又有無諗到而家好多餐廳搵食艱難，有些食店問職員拎杯水都要收費
花果茶有濃濃的果香，沒有糖，清清的茶
可以為大家清清味蕾品嚐到甜品的真美味　

黑松露撻 $32
這個離遠就已經聞到香味

當初見朋友叫黑松露撻，心想一定是曲奇皮或者酥皮吧
對剛跟家人午飯後的我提不起興趣
但聞到香氣大家都把持不住了.................
閏密是會強搶的~~~哈哈哈~
很快就被瓜分了~~~

先講撻皮，是三層很薄很薄類似威化紙的
一入口就脆脆，有點似食粥的薄脆，但這個比薄脆薄得更多
撻皮有牛油的香味又不會太油
菇跟黑松露的味道超配，有少少忌廉汁
不會令到撻皮變淋

侯爵特濃72心太軟 $48
心太軟有新舊版之分
我地就食新版

初初都各有各叫的~~~經過黑松露撻後，我地每樣來到都分一輪啦~~~
心太軟~~皮薄，流心多~~
加上朱古力濃，愛黑朱古力的朋友不要放過啦

芒果窩夫$48　
重點不是窩夫，而是芒果汁
有好多餐廳都是用現成的醬汁來配搭
用現成的醬汁好多時都係偏甜
這個就是廚師用新鮮芒果打蓉再過篩
點解我會知會過篩? 因為我自己整過唔過篩係整唔到咁幼滑的汁
呢個心思是值得一讚

另外店員都細心見到我地有朋友大肚近期戒凍食
就主動問我地要唔要雪糕另上　　

分子啡布甸椰皇子$45
焦糖布甸滿有蛋香和焦糖的味道
再試試咖啡啫喱，不太甜，有濃濃的咖啡香
連埋焦糖布甸一起食就有多種味覺刺激味蕾

再試試椰奶清香，可以中和焦糖布甸的甜
初初諗住只有焦糖布甸，咖啡啫喱跟椰奶椰肉就沒有啦~~~
結果寶物尋椰底
有椰青水整成的果凍，味道清甜　　
為整個甜品又多一個味覺層次　

櫻花樹下$35
一個很有日本風的甜品名
當然用一個很有日本風的碗

一打開有完隻蘋果加川貝龍眼肉
初嚐就覺得糖水較甜
由於蘋果帶點果酸連糖水味道就變得剛剛好
呢款絶對啱日日叫減肥但又想食糖水既朋友　　

到最後我地仲encore 多次黑松露撻
睇來今天大家既減肥大計都唔成功架啦~~~~
甜入心的甜品價錢相宜
服務態度細心
下次一定會再試

2016年3月19日星期六

逃不了酸辣粉的魔掌

在一次旅行食過酸辣粉後，就經常都中了酸辣粉的魔咒
正宗唔食唔安樂
難得到旺角就去一去旦王啦
旦王的位置近火車站
所以每次到旺角幾乎是必食之站

由於今次行程有點兒趕
所以唯有外賣啦
所以食物的相片就無咁好睇啦
但各位請相信味道仍然是很好的
信義妹近期要戒辣.................要咗小辣$23

信義弟就要噴火勁辣$23

兩個麻味跟酸辣味十足
另外孭然粉的香氣令到味覺多一個層次
店員絶不吝嗇花生榨菜芫茜
愛吃配菜的必定讚不絶口
花生夠香口
芫茜夠新鮮
榨菜不太鹹又能吸收到酸辣的味道
不過信義妹就覺得今次店員下糖就重手咗少少
所以甜味偏多
下次要叫店員糖方面要輕手一點
另外，佢地都會提供多麻少辣，多辣少孭然等等的配合
所以大家去既時候都可以同店員講一下自己的喜好
等食得開心又高興

芝味誘惑

難得今日可以有幾小時的忙裡偷閒
就約失業中的閏蜜好好偷閒一下
一見面閏蜜就問要唔要食野
睇來大胃王的印象深入人心................哈哈
有得食就食先啦~
反正大家都旨在見見面，談談情~~

一路行，閏蜜一路就表示我地的目的地
係一開門就有人衝入去買的食店
心諗..............真的有那麼厲害嗎??
另外，店舖是以信義妹最愛的芝士做主打的
經這麼一提，我地之後的話題全都是食~~~~

行到就差不多十二點
剛剛閏蜜先話隔兩間店就到
我地就見住有人跑入去啦
我地都唔執輸行快兩步

入到裡面已經俾陣陣芝士味吸引

轉身一望就俾糖果牆吸引

內有少量雅座俾大家

熱血的閏蜜點了貓山皇芝士雪糕$30

賣相精緻，店員是一粒一粒朱古力於上面的
落足心機整每一份食物

第一啖，濃濃的榴槤香樸鼻同充滿口腔
跟住開始有淡淡的芝士味
估唔到榴槤配芝士會有如此微妙的感覺
加上有少量的朱古力令到味覺多一種甜味層次
味道亦不會太甜
雪糕內亦有少少榴槤肉，質感豐富
雪糕筒脆口薄身
大家唔好以為雪糕淨係只有面的一球
連雪糕筒內整支都充滿著雪糕
$30有種值回票價的感覺

我就點杯芝士荔枝紅茶$22
初初我仲大鄉里問有無熱飲
店員都耐心解釋呢款只有凍飲
但可以為我少冰或者走冰

蓋面有溫馨提示，點樣先可以直正品嘗到飲品的真味　

一打開大約有三份一是芝士奶泡
三份二是荔枝茶

先講講芝士奶泡先
奶泡幼滑，味道帶微酸，似cream cheese
荔枝茶
茶味不帶苦澀，有紅茶的香氣，另外荔枝味適中
無俾生果的味道蓋過紅茶跟芝士的味道
令到飲品層次豐富

半熟芝士撻就選擇原味$18

一咬流心芝士已經流出來啦~~~~
帶少少酸，令到不易膩
撻皮牛油味香，口感脆口
食到外脆內軟的感覺
撻皮亦都薄身，唔會覺得太厚

總結，店員快手有禮，不消一會長長的人龍都可以處理好
食物有心思，唔會因為芝味濃而搶其他味道

2016年3月15日星期二

尋找昔日的包包

講起來，而家都有好多包款選擇
腸仔包，餐蛋包，PIZZA 包，紅豆包
但最令我懷念的必定係以前的硬豬仔包
而家可以係街到買到既多數都係法包
什至乎有好多人會將法包當以前的硬豬仔包賣
所以而家我一見到貌似的總想買一個試試
可惜每次都失望
以往的硬豬仔包係外脆
內軟靭
而家好多法包都只係外脆內軟
有些什至係外軟內軟.....................

早幾日等朋友時經過A1
人山人海

就在門口見到大大件的麵包

就想起早前有親友提過這裡都有一個類似以往硬豬仔包的包
反正都未試過，如果有就買一個試試看啦

找到一個大版一個細版
細版的只淨下一個
就買個細版的試試

食落外有少少脆
可能係我無即場食係同朋友行一輪街帶番屋企先食的關係啦
內都軟靭
呢個可以話我食咁多個最似的一個了
總算找到似層相識的味道和口感

下次要再買一個試試即場會不會更脆

如果大家有心水既硬豬仔包推介的話，請話我知呀
只要係香港境內我都會搵個機會去試一下

2016年3月14日星期一

大家樂~二人餐~

見朋友間一直都瘋傳大家樂二人餐既情況
但總係遲遲未敢試.................
由於之前個中秋盤菜中伏....................味道完全唔合全家胃口..............
所以之後對大家樂非主流既食品帶有一定既保留

最後都決定要試一試
$88有雞有意粉，豁出去啦~~~

沙律完全無驚喜
有少量薯仔，但醬太多
多到會覺得自己食梗沙律醬，裡面啲生果薯仔係配料....................

主角雞到啦~~~
呢隻雞就真係有驚喜啦~~~
夠滑，就算係雞胸都唔會粗，唔會過熟
隻脾就更滑啦
味道濃厚適中，香草的味道剛剛好不會太剛烈而覆蓋整隻雞的肉味
配菜薯波同粟米都一般

食完隻雞，肉醬意粉就要留第二日食啦
但係份量就比平日既少一啲
兩個正常食量既人就絶對夠食

2016年1月21日星期四

We are buddy~Buddy's Kitchen~

餐廳裝修花心思，有一種俾情侣拍拖的感覺
可惜門口那張限時的紙就大殺風景
當晚去都唔多人，所以無為意我地有無超時
只可以慨歎而家舖租貴，商戶都想多翻枱

有DINNER SET
都算多有得揀

我地兩個人每人叫咗一個DINNER SET
湯同沙律二揀人
南瓜湯~ 香甜濃郁，但我喜歡加少少黑胡椒加添少少辛辣味

平時出面多見用碗或者湯碟盛湯
呢間就用簡約的杯來，有一點兒特色

沙律方面，認為汁太酸，醋略為多了一點，不太適合我口味
但烟鴨胸抵讚唔太鹹，夠鬆軟，仲可以食到淡淡的肉汁
唔似出面有啲一係鹹到暈，一係硬到好似食鴨乾咁

主菜方面
兩個都抵讚
一來到只係賣相都令人讚歎
很美~~~~睇見都想食~~~
牛扒~~5成熟控制得剛剛好
焗薯皮，平時出面好多都會係薯條或者薯角
呢間絶不HEA 做，連配角都好好打扮
最讚都係燒蒜
惹味，完全無諗過蒜都可以拌菜之一
平時多見的都係蘿蔔仔，西蘭花
有特色!!!

帶子墨魚汁飯，咸味適中
香味濃郁
但帶子就略為淡味

餐飲就應該算最無特別的地方
因為有很多都要加錢
唔加錢就有普通既檸茶檸水咖啡

兩杯都無大驚喜
只可評普普通通

總結，都值得再去的一個地方
地方不太寬敞
如果有大袋既朋友可以請待應幫你先存放好

地址:大圍積存街20號地下

2016年1月13日星期三

韓風熱潮~韓食角~

OPPA帶起很多人對韓風既熱愛
除咗韓燒，一提起泡菜就一定會諗起韓國
九龍灣每到午飯時間一間小小的店就會有人龍既出現
廚師係韓國人，太太久不久都來幫手

第一次試就已經留下美好回憶
廚師每次都係笑臉迎人，
不論你只係在面前走過的路人甲乙丙，定係幫襯的食客
面對人多單多，仍然笑笑的~~~~

點了泡菜豬肉飯$38
下單後要到美味點俾錢
呢頭俾完錢，就已經可以拎飯啦~~
有速度!!!!!