信義藍星扎記

2018年11月14日星期三

貼地保濕臉霜～肌研糀潤雪凝霜～

提取日本白米發酵精華，提升深層保濕，淡化乾紋的功效。成份天然，無添加香料、色素、礦物油、MIT防腐劑、螢光劑，為肌膚帶來剔透亮澤。
質感軟糯細緻，容易推開。使用前油水比例極度唔合格，水份24%油份36%，完全需要入冬急救。使用後，臉清爽無油膩感，油水相對平衡多了，水份增到48%油份降至31%,感覺相當不錯。
#肌研糀潤 #真心推介 #萬寧有得買

2018年9月20日星期四

糖霜曲奇初體驗 ~LEARNTIFY~

近日同小卷一齊參加了Learntify 主辦「JSA 糖霜曲奇講師證書課程」。

兩小時的課程由日本遠赴而來的老師指導，在場亦有即時傳譯，唔駛驚聽唔明做唔到。由於老師細心的教導，小卷都能完成作品。

四塊作品，信義妹負責紫色立體花同埋生日牌寫字，其餘的小卷一手包辦。點解寫 Happy Bday？？？因為嗰日係六仔生日，小卷就諗住送俾爸爸啦～

專注的小朋友最可愛~~~~

除咗糖霜曲奇，仲有和菓子藝術課程信義妹都想參加啊！

最後，多謝Learntify邀請好讓我倆有一段難忘既時光。

Learntify主頁

想睇下有咩學可以去呢度睇下

https://www.learntify.com

JSA Hong Kong 日本salonaise烘焙協會香港本部

www.salone-ze.hk

#糖霜曲奇 #cookies #cooking #bloggerhk #hkfoodie #hkfoodblogger #foodporngarphy #foodlover #foodielife #foodshot #foodstgram #shunyeemui #信義妹 #吃貨#foodbeast #igfoodie #foodshare #為食信義 #信義藍星札記 #kids #toddlers #成長紀錄 #loveyoutothemoonandback #babygram #toddlergram #happykids #六義育兒 #信義煮意

洪館都食咗好幾次啦~
而家先寫篇食評
只可以講懶........................
哈哈
我會勤力多啲架啦~

講番洪館先~~~
領展話事之後，附近都無咩食啦~
六仔成日都話食
見個餐牌...................
初初真係吸引唔到我
一眼望去都係普通料來啫

直到有一次真係試啦~~~
估唔到都有驚喜
先講下花膠炆冬菇 $48 先
$48你就唔好預人地俾啲驚天地泣鬼神既花膠你啦~~~
以呢個價錢食到我都已經覺得有賺啦~
件數仲要唔少添
味呢~~~~花膠又確實唔覺佢有咩味
呢個真係要扣梗啲分
但係個冬菇就真係抵讚
作為菇控的信義妹
見到隻隻都手心咁大既冬菇
仲要厚肉，
真係勁開心呀~~
味道做得好好，唔會好鹹，入口仲帶少少甜味
所以呢~~之後我地好多都會叫炆冬菇 $25

信義妹通常既配搭會係花枝丸，瑞士雞翼，烏冬，麻辣汁
呢度既花枝丸真係可以食到花枝架
仲有咬口，值得一試
麻辣汁辣但不麻
如果要計正宗就唔合格既
但計辣就算合格啦!
瑞士雞翼同烏冬就無咩特別
湯麵套餐$36
送豆漿
抵食啊~

其實仲有醉雞，醉豬手類既
但信義妹唔飲得酒就無試啦
等我第日飲得既時候就再同大家分享下啦~~~

地址: 大圍顯徑邨商場117號地下

多多聯盟～夏茶～

冬天易肥
夏天顯肥
信義妹成日咁飲。。。。呢次唔肥都難啦！
天氣熱難免想一飲再飲，消消暑氣
有新店就試試吧！
條人龍長到要截龍。。。。真好彩係尾二排到
人多自然就等一下啦！

草莓大滿足
呢個絶對為愛莓人士已設，勁量的莓肉。沒有很假的藥水味，沒有很甜，有淡淡的果甜加上莓的微酸。

檸檬多愛玉
檸檬加益力多加玉的組合。飲品名有種戲名的感覺，信義弟就話味道有 WD 40 的味道。。。。呢個見仁見智啦。。。。。我唔愛機油味。。。。。

鮮芒多多
好 Fresh 既感覺，但芒果味唔覺好濃，味道清新。味道屬於偏淡的。
說實話，信義妹寧願偏淡都好過一味加人工甜味。

百香果多多加珍珠
珍珠係白珍珠，煙韌有咬口，味道唔會好甜。百香果帶微酸，配上益力多的甜，絶配呢！**本人是百香果忠實粉絲**

整體飲品味道都係偏少甜，如果喜愛多甜或想要正常甜味的朋友就記得要同店員單聲啦！
地址：元朗康樂路8號康樂廣場地下3號舖

肥腫難分 ~Diet Maru 消水丸~

好多女仔都會話自己一朝起身腫到豬頭，
總要啲時間回魂先似番自己個樣
又或者會話自己勁難減到肥，越減越肥
呢啲都係水腫既其中一個特質

近期日本人氣產品 DIET MARU 消水丸
以草木來調節體質，唔駛驚飲苦茶，
味道酸酸甜甜，容易入口
其中成份有香醋、玉米鬚提取物、植物複合酵素、薏仁等
溫和調理身體，達到祛水消腫功效。

產品使用係美國OCIA認定既有機原材料，
同時係GMP指定的栽培基地，
而且經過SGS產品測試，符合國際標準。

每日食1包，
無限時限地，
想幾時食就幾時食。
30日為一個療程，
有助改善新陳代謝，
幫助排水。

以後大家排水祛腫可以選擇DIET MARU 消水丸啦!

2018年8月19日星期日

炸物天下～小息時間～

有幾耐無放過小息呢？中學之後啦！近期元朗巴士總站新開一間小食店，小息時間。
以台式炸物為主，鹽酥雞，炸鮑菇，炸西多等等。可以散賣或者跟餐，餐就係炸物+炸薯條+飲品

飲品有汽水或者梳打，跟汽水$29,跟梳打$33

薯條亦都有多款調味粉選擇，紫菜，香辣，蜜糖等等

信義妹就揀咗鹽酥雞同炸鮑菇。

鹽酥雞，第一眼見到。。。。咁黑既。。。。肉質雖滑，但唔多汁，味道屬於濃味偏鹹。薯條調味粉揀咗紫菜，略少，因為有鹽調味所以不太淡。

杏鮑菇，呢個最合心意，多汁之餘又唔太鹹。薯條揀香辣粉，辣粉帶微甜，但信義妹嗜辣，所以覺得唔夠辣，普通辣既朋友應該可以的。

飲品分別係芒果梳打和巨峰梳打，無咩特別，唔太甜，係特別多冰。。。。。。。

店員有禮，店舖整潔。
地址：元朗擊壤路9號金寶大廈地下6B號舖

2018年6月26日星期二

果茶滋味～蠔滋味美食坊～

近期忙到嘔曬泡。。。。都係買下飲品奬下自己啦！近期雖然黑糖珍珠大熱，但。。。。。都係去試下新店。

新鮮水果茶都係一個唔錯既選擇。
買得俾自己就梗係會預埋俾屋企人啦！見到餐牌選擇都多喎！有果茶，有朱古力，有華田，有椰皇類。。。。

特濃朱古力四重奏 $28
濃厚的朱古力加上 Oreo碎,啖啖都有朱古力味，因為有鮮奶㬙關係更顯幼滑。

原粒百香果水果茶 $23
百香果向來都係信義妹最愛，台式飲品好多時都會點佢，呢度係用新鮮百香果唔似出面係糖水溝架。茶味唔太濃，無遮蓋百香果的香，甜度適中，適合不太嗜甜的信義家。加上不太甜就唔會蓋過百香果的味道。

菠蘿水果茶 $23
菠蘿唔係罐頭菠蘿，係新鮮菠蘿，所以係會帶少少酸少少甜，配合茶底，作為飯後消滯都幾好。

鮮雜果水果茶 $26
有好幾款鮮果混合，橙，梨，蘋果等，如果有選擇困難症既朋友揀呢個就最啱架啦！因為咩生果都有！

華田珍珠
華田係特濃系列，但店主太忙唔記得放珍珠。華田濃滑是加了鮮奶的緣故吧！配上Oreo 碎增加口感。

地址 : 元朗大陂頭徑14-24號褔星樓地下6號舖

2018年6月11日星期一

迷你美食廣場~蠔滋味美食坊~

如果有啲女仔行名牌時裝店會HIGH 爆
信義妹就應該係行冷舖同食新開食店會HIGH 爆
近期好多朋友都講梗呢度
一間店內有好幾間不同既細店
好似一個迷你美食廣場一樣，中西日地道都有

今次就揀咗幾款試下
爆醬玉子燒 $30

爆醬既程度就無我想像中咁多
芝士味就比較淡
但因為我係芝士狂熱者................所以.......對於唔愛芝味既朋友就可能會夠
點為之狂熱呢...........就係信義妹食芝士火鍋會額外加芝士粉囉~~
粟米粒都頗多，係罐頭粟米
整道都有少少偏甜的
木魚整整鋪滿~~~慢慢飄動~~~~哈哈~~~

再到另一間買黑松露芝士薯條 $38
呢間仲有墨西哥薄餅的
可惜今日唔太肚餓就無叫啦~

薯條係粗薯條
店主好細心問要唔要鹽，要唔要黑椒，芝士醬夠唔夠
服務很好呢~~~~
熱食外脆內軟
配上芝士同黑松露醬
鹹酸香濃集於一身
有酸係黑松露醬帶有沙律醬
呢個值得再食呀!!!!

最後到街頭小食啦~~~~~
見到呢位姐姐.........信義妹俾錢嗰陣都忍唔住大叫
陰功囉............
姐姐對手俾滾油彈到體無完膚
而姐姐就無奈地笑笑
搵食艱難...................

臭豆腐$15
比平常食到的大一點
臭就唔太夠，但都還可以既
皮脆內軟，內唔滑啊~~~
加上必配既甜醬同辣醬
辣甜脆軟一次過滿足幾種滋味

其實仲想買埋水果茶既
因為見係新鮮百香果同菠蘿都係$23
但今日胃口欠佳...............下次先啦!!!!!!!!!!!

地址 : 元朗大陂頭徑14-24號褔星樓地下6號舖

2018年5月20日星期日

為辣痴迷~好滾得~

信義家嗜辣，
正宗係去到無辣不歡的情況。
當見到有60萬度辣挑戰的時候，
信義弟一直都想試一下
為的唔係奬金$5000
係一試60萬度入口的滋味

所以擇個吉日，
其實係擇個得閒既日子
都唔知點解兩姐弟越來越忙
就去試下啦

之前我地仲商量梗好唔好一家幾口去
點知上網睇全部唔係辣就係有酒
咁小卷點食呀~
結果就只得我同信義弟去啦~~~

去到原來都有唔辣既湯底
除咗有酒既野, 仲有啲平常既野食
早知就帶曬啲人一齊來高興下啦~

我地點了檸檬沙冰同柚子沙冰
除了餐廳經理係識分，
連上菜既員工都分唔到...........
檸檬沙冰係有檸檬核的
柚子沙冰係會有柚皮的
兩杯飲品不太甜，味道清新

想挑戰60萬度肉丸就只有兩款湯底選擇
雙龍出海
蟹煲
亦都唔難怪好多都介紹蟹煲
因為九點半前6折
而雙龍出海係無折的，
大家同樣都係$4XX 咁自然好多人都會選有折的

我地就來個不同
雙龍出海
有兩隻波士頓龍蝦、蜆、菇、白蘿蔔
湯底雖然滿有辣油但不辣

還點了一個豬腰
豬腰夠爽脆、無異味

真正的主菜來了
60萬度辣肉丸
每粒大過乒乓球，搓的時候一粒大過一粒~~~

質感好似濕泥一樣...............
因為只有辣粉..................
豬肉得極少量，估計大約一成是豬肉
見到其他人之前既片係夾起先開始計時
但我地開蓋就已經計時啦
三分鐘，撈起都已經用你1分鐘，仲要熱食.............
所以挑戰失敗
失敗唔係因為辣，係因為乾食同埋熱~~~
唔梗要啦~~~我地志在參與，體驗一下
想睇當日既片就要去FACEBOOK PAGE 啦~~~~

地址:灣仔克街9-13號地舖

D的意志~香港海賊王餐廳~

D的意志
係海賊王漫畫係一個伏筆
不論係艾斯 PORTGAS D. ACE 定係主角路飛 MONKEY D. LUFFY 都有D
究竟呢個D 係有咩意思就要等尾田大神拆解啦!

香港海賊王餐廳都存有D 的意志
而呢個D 係DELICIOUS
作為粉絲必定會去潮聖

試咗好幾樣
真係後悔無CALL 大批人馬到場
有幾款需要多人食先食到

路飛四檔豬仔脾 $118
豬仔脾炆得好淋又入味
輕輕一切已經離骨
女仔食都唔駛驚失儀
鹹味算適中
加上有菠蘿同車厘茄帶酸甜開胃

三刀流串燒 $278
左起:海鮮、雞肉、牛肉

海鮮串為三文魚、蝦、帶子
三文魚油豐富、食落油脂感重
帶子剛剛熟唔會過火
中間亦有混入洋蔥、紅黃椒
可解油膩感之餘亦豐富視覺色彩
如果覺得味道唔夠濃亦都有醬汁相伴，
醬汁有濃濃的牛腩味呢~

雞肉串
雞肉厚而滑嫰，沒有過火而影響到肉汁
有青瓜跟紅黃椒相伴感覺清新

牛肉串
牛肉外熟內鮮，但又無血水流出
最啱信義妹口味
呢款本身味夠濃，唔沾醬都已經好好味啦~