簡易祛濕 ~紅豆薏仁湯~

驚蟄啦！春雷都響了！春天來啦！天氣開始濕到扭得出水啦。。。。唔知大家濕重唔重啦？
如果你成日好似好攰，容易水腫同埋胃口麻麻地，就有機會濕重啦！濕太重又會影響脾，脾差就會影響營養既輸送，所以祛濕都係一個重要項目。最少對信義妹係～～

最簡單的方法就係紅豆薏仁湯。

紅豆，在中藥裡叫「赤小豆」，亦都有明顯的利水、消腫、健脾胃既功效。因為它是紅色，紅色入心，因此仲可以補心。而家香港人精神壓力大，心氣虛，飲食唔均衡，運動量少，脾虛濕盛。除咗要祛濕，又要補心，還要健脾胃，紅豆薏仁湯就簡單到位啦！

順帶亦都講下生熟薏米先～

生薏米
主要係祛水，有清熱祛濕排毒既功效。加強腎排水，可以將體內多餘既水份排出。生薏米係寒涼架，所以孕婦忌用，如果你係虛寒體質或者 period 期間都要小心服用。

熟薏米
健脾之餘，仲可以帶散胃部消化而成的營養，重振食慾及助身體營養吸收。
所以點解煲湯既時候成日聽到有生熟薏米一齊落就係咁解啦～

信義妹除咗紅豆同薏米，仲有桂圓同百合。

桂圓益心脾，補氣血，安神既功效。
百合潤肺止咳，養胃，清心安神既功效。

材料：
紅豆 2碗
生熟薏米 1碗
桂圓 20粒
百合 半碗
陳皮 1角
*紅豆同生熟薏米會預先浸
*煲1～2小時就搞掂啦！
*愛甜就隨意加冰糖啦！